情侶•貓奴必遊關東第一大貓之島－8日8夜東京上山下海花見之旅 Day 4－Jovus的美好頹廢時光

江之島•湘南海岸•鎌倉一日遊（2）－8日8夜東京上山下海花見之旅 Day 4

江之島瞭望燈塔＋貓島＋中村屋羊羹店＋奧津宮＋龍戀之鐘

去完中津宮參拜，我哋就嚟到龜岡廣場。Sea Candle「江之島瞭望燈塔」矗立在海拔119.6公尺嘅島上，塔高59.8公尺係『江之島』最顯著地標！無論塔上塔下都係眺望湘南海岸美景嘅最佳地點。

瞭望燈塔係喺 Samuel Cocking Garden （江の島サムエル・コッキング苑）裏面。雖然原來嘅溫室在1923年關東大地震中遭到摧毀，但重建後嘅Samuel Cocking Garden（山繆克金花園）仍然係一個觀光景點，每年吸引超過50萬嚟參觀嘅旅客。「江之島瞭望燈塔」＋Samuel Cocking Garden嘅入場費係500yen！

另一邊見到整個湘南港，而碼頭係『江之島遊艇俱樂部』船塢，可以停泊1000艘遊艇，係喺1964年為奧運遊艇競賽而增設，現在係俾遊客享受海上活動嘅據點。

江之島瞭望燈塔行番出嚟廣場又有一個小櫻花林。

從公園望出海邊，見到海天一色。

你有聽過日本嘅貓島？日本係島國，由好多大大小小嘅島嶼組成。貓島，其實就係一D小島，大部分本身以捕魚或工業為主。但隨著產業式微，不少居民搬到市區謀生，人煙漸少，但在島上生活嘅野貓或家貓們則繼續留係度繁殖，結果繁殖到喵星人仲多過人，因而得名。係島上不難見到三五成群嘅街貓，身為貓奴嘅各位不可不去，去完驚唔捨得番去呀喵～好似我個fd！

江之島又被稱為「貓之島」，係關東人氣第一嘅貓島。要數天下間最最最幸福嘅街貓，肯定係江之島上一眾喵星人。牠們嘅數目難以估計，總之係無處不在。雖然唔是每隻「江之貓」都平易近人，但牠們在島上得人關顧，所以絕大部分都對人好信任。守護小島嘅「江之貓」在島上的日本貓咪全部都肥嘟嘟，證明江之島真係「好食好住」的貓天堂。江之島確實係非常適合貓咪居住，樹蔭和草地無處不在，臨風日下瞓覺，十分寫意；滿街都係小食店同餐館，好心嘅老闆對牠們每日供應三餐，牠們唔使愁會捱餓。

不過，其實江之島上嘅流浪貓，唔少都係俾人特登遺棄嘅，有人會從好遠將貓抱嚟「放生」，或者係看中呢度係個貓天堂！不過，因為擔心島上嘅貓會急速繁殖，島上有一個募款箱，板上寫住捐款係為咗給被遺棄嘅貓咪絕育，真係好細心。島上嘅人愛貓，貓亦會好好守護江之島數百年嚟嘅動人故事。

我幫喵星人按摩，你睇佢幾享受～之後仲翻轉身要我幫佢梳毛！

行前少少就見到環繞神社，裏面供奉「江之島大師」。

江之島雖然有好多上落樓梯位，但連小朋友都自己行，婆婆拖住佢，佢扭下扭下個小屁股好努力咁行! 我都有幫佢打氣！萌到爆～

從展望台往下行就係山二つ」（二分山），左手邊眺望稚兒之淵嘅山凹處，好似攞把斧頭，將島切分為二。據說這是由於因為沿著斷層長期被海水侵蝕形成咗海蝕洞，出現崩塌，將江之島一分為二，所以稱為二分山。

地下可以見到磚紅色嘅泥土，呢層土壤層係由富士山嘅火山灰堆積而成㗎！

繼續向前行，行多一陣就嚟到中村屋羊羹店喇！

中村屋羊羹店係以元祖手工海苔羊羹著名嘅百年老店。中村屋嘅海苔羊羹喺1902年由中村屋第三代繼承人創作出嚟，海苔羊羹仲曾經獲得第22屆年度糖果博覽會一等賞金牌。老店果然係老店，無論師傅定係店員都好友善，充滿笑容。

中村屋有一間小小嘅茶室等大家可以坐喺度飲啖茶食個包！我哋試咗海苔羊羹、本練羊羹（下圖）同兩款女夫饅頭！海苔羊羹嘅味道好得意，一食就成個口係晒海苔味，甜甜哋又有少少鹹味。本練羊羹就喺好香好濃紅豆味，但對我嚟講就覺得太甜喇！

我同好友都超級鍾意女夫饅頭。唔好睇個樣咁普通，兩種饅頭嘅餡料都係用北海道紅豆做嘅豆沙，啡色饅頭外皮加咗茶葉同黑糖，白色饅頭外皮加咗日本酒同大和芋，兩款都好好味，必食！！！女夫饅頭係江之島特產之一，中村屋女夫饅頭亦曾經喺全國糕點博覽會贏得榮譽金獎，夫妻必食，可以保佑兩人白頭到老。

原本超想買中村屋女夫饅頭番去俾屋企人食㗎，因為實在太好味啦！但好可惜保鮮期只有4日，而我要4日後先番香港，所以好友同店員都叫我唔好買，所以唯有忍痛唔買......

不過我仲有羊羹可以買！日本傳統甜點羊羹一般都係俾「好朋友」送禮佳品！無論係喺「多啦A夢」定係「櫻桃小丸子」入面，當媽媽收到羊羹都超級開心，所以我都買咗番屋企， Daddy好鍾意食！

好啦！當大家嚟到呢個位，見到呢個標示，證明江之島嘅景點已經睇咗一半啦！

繼續一直行就會去到「江島神社-奧津宮」，喺到達奧津宮之前又會見到一個小花園，大家估下有咩喺度？

好！開估！就係洗手間喇！最正係個水龍頭真係條龍嚟㗎！名符其實係「龍頭」。男女廁都有「龍頭」，好公平，大家都有得用！都係嗰句，唔好問我點知，反正我就係知。

洗手間出面有一個手水舍，吐水出來係一隻龜，柱底下都係用4隻龜作為基底支撐。

經過烏龜手水舍沒幾步就見到龜石（龜甲石）個牌，龜石係鎌倉四名石之一，塊石頭嘅形狀同紋路真係好似龜甲！

龜甲石附近仲有一塊力石，係江戶時代用嚟作為力量競技使用嘅石頭，重量超過三百公斤！

終於嚟到「江島神社-奧津宮」，奧津宮供奉「多紀理比賣命（たぎりひめのみこと）」。

日本名將源瀨朝曾到江之島為戰事祈福！而奧津宮嘅鳥居傳說係由源瀨朝所捐獻嘅，旁邊可以見到有塊石碑，上面刻住「源瀨朝寄進的鳥居」，宜家見到嘅係喺平成年間再修建，話說舊嗰個係俾颱風吹爛咗，所以先再建！

奧津宮附近就係「龍宮」！龍宮蓋成一座石洞，而不是人類建築，裡面有D潮濕陰暗，完全就係洞穴。

終於嚟到龍宮，就同大家講下江之島形成嘅故事啦！記得中學時睇過林詠琛嘅小說《雨色之男》，書中曾經以戀人之丘作場景，當中提及江之島形成嘅故事同龍戀之鐘嘅來歷：「孤獨地屹立在海中的江之島，流傳着一段浪漫的傳說。傳說，在很久很久以前，在鎌倉的深山裏，蟄伏着一頭兇惡的五頭龍，在晚間出來作惡，專門擄走小孩子當晚餐吃掉，令村民生活在深深的恐懼中。一天，漂亮的仙女下凡拯救世人，當仙女撥開雲層降臨人間時，江之島就在大海中突然冒起了。五頭龍愛上了仙女，但仙女討厭牠邪惡的本性，五頭龍為了仙女終於改邪歸正，兩人最後一起化成凡人，終成眷屬。為了紀念傳說中五頭龍與仙女的愛情故事，在江之島的戀人之丘上，屹立着『龍戀之鐘』。傳說中，只要登上江之島的頂峰，與戀人一起，敲響那兒的古銅大鐘，兩人便永不會分離。」而嗰位仙女就係弁天（弁財天）。

後來惡龍老死之後，就化身為江之島對岸嘅龍口山，永遠看顧著江之島及湘南沿岸嘅居民。龍口處被稱為龍之口。居民建咗一座龍口明神社嚟祭祀由五頭惡龍變成守護神嘅五頭龍大神。

喺龍宮斜對面有一條小路通往龍戀之鐘。有一套由松本潤同上野樹里主演嘅電影《陽だまりの彼女》（寵愛情人夢）就係喺在江之島拍攝，畫面好唯美，內容亦都好啱喺江之島呢個貓島取景！而龍戀之鐘就係取景點之一，仲特別將主角的愛情鎖做成解說牌。其實龍戀之鐘本身睇起來好簡單，周圍欄杆上密密麻麻嘅愛情鎖反而比較顯眼。

傳說只要一對戀人喺鐘下一齊拉着鐘繩，合力敲鐘三下，邊敲邊叫住對方名字，那就會得到愛的祝福，二人就可以相愛直至永遠。龍戀之鐘旁邊有一排鐵欄杆，好多情侶都帶同鐵鎖嚟到，他們會先在鎖頭寫上雙方名字，以及敲響龍戀之鐘嘅日期，然後誠心許願，據說咁便可鎖住對方嘅心，一生不變。如果做到咁都仲覺得覺得未夠，仲可以叫愛人到邊津宮「戀愛神木」前面，寫下愛的承諾。相信過了江之島嘅「愛情過三關」後，兩個人應該「打風都打唔甩了」！