江之島•湘南海岸•鎌倉一日遊（3）－稚児ヶ淵＋江之島岩屋
我宜家係邊？我咪就係沿住御岩屋道繼續向稚児ヶ淵（稚兒之淵）同江之島岩屋進發囉！喺呢度有3塊石碑，我冇深究，因為望出去就見到富士山！
嗱！雖然小妹我個朵係「雨神」，但其實每次去旅行，我最想睇嘅、要睇嘅，都一定可以見到！好多人都講過最容易觀賞到富士山嘅季節一定係冬季，竟然俾我喺春天，3日係可以見到富士山嘅區域都見到富士山，仲要冇遮冇擋完美呈現，真係衷心感激富士大神！
繼續向下行就係稚児ヶ淵 （稚兒之淵）。江之島上嘅愛情故事又點止「龍戀之鐘」一個，另一個就係稚児ヶ淵 （稚兒之淵）嘅故事！
稚兒之淵係關於一個禁忌嘅HeHe 之戀。（利申：本人唔係腐女！）
故事由來係喺中川喜雲所著嘅『鎌倉物語』裡面，講述鐮倉相承院嘅稚兒白菊與建長寺廣德院嘅自休藏主之間嘅悲慘愛情故事！鎌倉幕府時代，相傳當時嘅名剎建長寺有位主持和尚名叫自休。有一日，自休嚟到江之島向弁天祈願，回程路上遇到相承院稚兒白菊（稚兒就係少年僧）。自休對白菊一見鍾情，被白菊深深吸引。
白菊知道自休嘅心意，咁樣嘅情愫係唔應該存在，佢哋嘅感情更加唔會受世人接納。於是，一晚深夜，白菊寫咗一首辭世詩就嚟江之島跳崖自盡。自休知道後傷心欲絕，佢亦寫咗首辭世詩，就追隨愛人嘅腳步，跳落江之島嘅懸崖。佢哋跳崖嘅地方就係稚児ヶ淵 （稚兒之淵）。
稚兒之淵係一塊橫跨５０米隆起嘅海水沖蝕高地。
尤其係日落時從稚兒之淵遙望富士山，景色超靚，呢度係神奈川縣風景名勝五十選之一！
富士山真係靚到好似一幅畫咁！好似浮喺海面上嘅仙山，終於明白點解古代人稱富士山為蓬萊仙境！
海水嘅顏色真係好靚～
雖然唔係假期，但依然見到有唔少人喺度垂釣。
最正係有個大叔，好悠閒咁坐係度，咩都唔做，淨係望住富士山！
跟住我哋就要向江之島最南端嘅岩屋進發！
先要行過岩屋橋，「江之島岩屋」就喺橋嘅末端。
江之島岩屋係經過六千年的海水侵蝕形成嘅洞窟，係江之島信仰嘅發源地！要來江之島岩屋嘅方法有兩種，一種就係好似我咁用雙腳走過整個江之島，一種就係喺通往江之島大橋上附近乘船處搭「弁天丸」直接到江之島岩屋。
岩屋入場費係500yen，用江之島•鐮倉1 day pass有discount，所以係450yen！
曾是不少高人修行之地。江之島岩屋曾是十三世紀著名僧侶日蓮 (1222-1282年)修行過嘅靈場；著名僧人弘法大師(774-835年)，曾經喺唐朝時到中國取經，傳說他發明咗日文字母平假名，亦曾經喺洞窟裏修行；一代名將源瀨朝則為祈禱戰事勝利而探訪過這裏。洞窟裏有內深152公尺嘅第一岩屋和內深112公尺嘅第二岩屋。
有關曾在洞窟裏修行的日蓮僧侶，就有一個非常詭異嘅傳說。據聞他喺撰寫「立正安國論」裏批評了鎌倉政府，被捕後他被帶往龍之口嘅刑場被處死，但行刑前，忽然從江之島方向射來一道光芒，令官員眼花撩亂，他因此奇蹟地獲救。於是，其弟子日上法人在1337年，在龍之口建立一座龍口寺，即離開江之島嘅不遠處。
洞裏還有江戶時代流行的一種風俗畫「浮世繪」、石佛和只在此洞窟內發光的神秘石頭等等，非常特別。參觀時大家會嚟到朦朧昏暗嘅洞穴裏，洞穴入面仲會播住神秘嘅音樂。
江之島岩屋原本係封鎖不讓人進入嘅，但在平成5年（1993年）嘅時候周遭環境整頓過後，開放俾遊客參觀，今年係江之島岩屋嘅開放23周年。
離開隧道，我哋準備進入第一岩屋。
由於第一洞窟非常陰暗，在通往洞窟最深處的入口旁還有人看守，會向每個要進入洞窟深處嘅遊客派發一小盞蠟燭，用來指路用。
穿過一條幾乎沒有燈光嘅隧道後，雖然洞穴內部有變得比較明亮，但整個洞窟充滿了石佛像，充滿咗原始宗教氣息。
由於洞穴好窄小，所有人基本上都要彎低身前行，偶爾石上面仲會滴水落嚟。
而且喺岩屋深處有一個洞穴，洞穴前係一D祭祀用嘅道具，實在好難不令人聯想洞穴裏面有D咩？！
雖然我哋嚟第一岩屋時，只有我哋兩個人，但感覺並唔算恐怖！岩屋不時傳嚟陣陣涼風，有傳係由富士山底下吹過嚟，好多人都話唔信，我唔係專家，所以唔排除真係有咁嘅可能性！
參觀完第一岩屋，我哋沿住原路離開。
去到手燭返卻所，記得將手燭交還。
交還手燭之後，我哋繼續前往第二岩屋。
呢個時候就見到有唔少人嚟參觀！
前往第二岩屋途中
暫時又回到陽光底下
嗱！呢個景曾經出現過喺之前見到嘅浮世繪之中。
沿路去第二岩屋途中，就見到靈龜出海呢塊大石！傳說呢隻龜就係浦島太郎所救嗰隻海龜。我啱啱仲見到整隻龜，但好快就因為潮漲被水掩蓋住！跟住後面嘅外國遊客，完全唔知我哋睇咩！
行入第二岩屋，雖然佢比第一岩屋光同闊，但講真，真係有種好詭異嘅感覺！
去到第二岩屋最深處，見到一座栩栩如生嘅龍雕像，加上有D弔詭嘅音樂，搞到我全身毛孔都豎起嚟，雞皮疙瘩都走晒出嚟。那條龍真係好令人感到非常震撼！
大家可以向龍神許願，只要誠心祈求，然後敲鼓兩下。只要敲鼓時，龍神後面會亮燈，代表願望一定會實現！個鼓聲大到我個心離一離！跟住就沿路離開岩屋。
留言列表
