初夏心動遊•東京近郊日歸小提案－8日8夜東京上山下海花見之旅 Day 4－Jovus的美好頹廢時光

江之島•湘南海岸•鎌倉東京近郊一日遊（1）－江島神社＋朝日堂本店＋奉安殿＋錢洗白龍王

位於東京近郊，擁有數百年歷史嘅連島沙洲─江之島（湘南之寶石），蘊藏住日本嘅歷史片段和神話傳說。江之島上面曾發現繩文時代嘅遺跡，所以在7,000年前就已經有人類居住。日本名將源瀨朝曾到江之島為戰事祈福；13世紀著名日本僧侶日蓮喺刑場上被一道嚟自江之島嘅奇光照射後，逃過被處死嘅命運；仲有為紀念五頭龍與弁天結合而建的龍戀之鐘。百年之後，事過境遷，江之島成為湘南海岸嘅旅遊熱點，小島亦變成喵星人樂園，自此便由牠們來守護着這些歷史傳說嘅痕跡。

江之島位於關西神奈川縣藤澤嘅湘南海岸、片瀨川河口，是一個周長約四公里，高六十公尺嘅隆起小島。江之島由兩道長六百米嘅橋將島和對岸連接，其中「江之島大橋」就係行人專用嘅通道。

今次東京之旅我出發前就check咗得一日好天，於是plan行程時就決定嚟江之島！嗰日證明我嘅決定非常正確，終於見到藍天白雲！加上氣溫有二十幾度，唔會太熱有唔會凍，超舒服！嚟江之島嗰日唔係週末，所以唔算好多人，感覺好悠閒，好似去咗南丫島咁！

江之島大橋係1964年為咗東京奧運而興建，並成為1964年東京奧運帆船比賽場地。走過江之島大橋，大約需時5mins，好快2020年東京又再一次舉辦奧運。

古時候，江之島對外交通非常唔方便。江之島原本係湘南海岸一部分，後來因為海水上升嘅關係，與陸地分離成為一座島嶼。江戶時代(1603-1868)，島民只有喺退潮時先可以通過堤道前往對面岸湘南海岸，但當潮水高漲蓋過堤道時，島民就得靠挑夫以轎車運送到對岸，路費亦以潮水的高度而定。不過，自1923年關東大地震後，成個江之島就凸咗出嚟與陸地連接，從此人們不受潮水漲退影響，隨時都可以前往江之島。更於1960年開始被指定為神奈川史迹名勝及日本百景之一。

在古代，由於日本修驗道始祖「役小角」，曾喺西元672年喺島上居住，因此江之島被視為聖域，直到1880年頒發「神佛分離令」後先允許江之島土地可以自由買賣，英國商人Samuel Cocking係開發江之島嘅先驅，佢興建咗發電廠和植物園，令江之島慢慢成為東京近郊嘅觀光熱點。

當到達島上時，會先看到一道綠鏽色鳥居－「青銅の鳥居」，那裏就係江之島及島上神社「江島神社」主要入口。雖然現在我們看到嘅「青銅の鳥居」係喺文政四年（1821年）再建嘅，但「青銅の鳥居」係藤澤市指定文化財產。大鳥居正上方鑲著“江島大神明”匾額，展現江戶時代嘅氣勢。

當年嘅參道現在係塞滿觀光客嘅商店街。

從鳥居出發，踏在石板斜坡路上仰望，見到山路向上微傾，加上小小斜坡兩邊全部係各式各樣嘅海產店、土產店、觀光旅館同餐館等一間緊接住一間，非常熱鬧。

嚟到參道末端就見到朝日堂本店 (あさひ本店) ，店前經常出現長長的人龍，吸引到如此多客人嘅人氣商品就係章魚仙貝（八爪魚餅）和龍蝦仙貝，把原隻新鮮章魚同龍蝦沾咗粉漿在高溫下壓成脆餅，每塊章魚仙貝大概加入了3至4隻小八爪魚。

仙貝都係即點即製嘅，用料新鮮，吃起嚟熱辣辣之餘又香口，章魚鮮味十分突出。除了章魚仙貝，店舖還仲有水母仙貝（350yen）同以伊勢龍蝦製成的龍蝦仙貝（600yen）同，雖然價錢比章魚仙貝貴（350yen），但同樣受歡迎。

八爪魚放喺機器裏用熱力抽乾水份，然後壓得扁平，超級鬆脆香口！我一拎上手就斷咗喇！一半碎咗跌晒落地！So sad!!! 因為真係好好味，個人覺得章魚仙貝比龍蝦仙貝，仙貝冇咩味，連住八爪魚食就好惹味！必食！！！食完就開始三個鐘環島遊！

參道末端係一座橙紅色鳥居－「朱の鳥居」，代表島上重要嘅神社『江島神社』到了~宜家看到嘅「朱の鳥居」係喺昭和11年（1936年）由山田流箏曲的演奏家林敏子再奉建嘅。後面就係造型好似龍宮城樓門般「瑞心門」。好多旅客視江之島為遠足勝地，環繞小島走一圈，包括停下來在島上的景點觀光，大約需時3hrs。我就梗係選擇行啦，自由行就係要仔細睇風景㗎嘛！

不過如果真係唔想行，遊覽江之島亦可以乘搭江之島扶手電梯，一共分為3層，只需5mins就上到島嘅峰頂展望台。但其實扶手電梯只係上到山頂，之後嗰一半去奧津宮同江之島岩屋係要行路，回程亦要全程行路！回程唔想行就可以搭船離開江之島！

不過，醒目如我，係知道落山有條捷徑，所以先決定行路嘅！

從「瑞心門」向上行，首先回見到弁天女神石雕。再行上少少就會見到「福石」（紅色燈台左後方），相傳喺度執到嘢就會帶嚟好運！（執到樹葉唔知算唔算呢？hahaha！）

「福石」傳說係咁嘅：喺江戶時代，有位戶長嘅長子名叫杉山和一，小時候因病失明，放棄戶長之位去到江戶學習針灸術，點知佢好努力都學唔好，師傅就趕走咗佢。有一日佢嚟到江之島參拜弁財天，回程時喺福石旁邊跌倒，感覺到隻手好似俾針拮到，於是佢執起，發現係一個竹筒，而竹筒裏面就係松葉。佢因此受到啟發，設計出竹筒針灸法。後來，佢轉到京都學習針灸，結合兩派技術，終於完成「杉山式管針法」。

學成之後，杉山返到江戶開設醫館，大受好評。當時嘅五代將軍德川綱吉患有腰痛宿疾，就傳召杉山去治療。杉山真係用「管針法」綱吉嘅腰痛醫好咗。於是綱吉任命杉山成為關東總檢校，檢校係當時盲最高嘅官職。所以大家都相信喺福石旁邊執到嘢就會帶嚟好運！

繼續向上行，喺到達邊津宮前，大家要淨手先可以去參拜！

繼續向上行就會見到「江島神社-邊津宮」。邊津宮供奉“田寸津比賣命”女神，喺西元1976年改建完成。邊津宮係江島神社嘅本殿，規模最大。入口有一個粗繩圈出大圈圈，大家依序「左右左」從繩圈穿過3次，把錢投入邊津宮錢袋納奉箱裏面，手拍兩下低頭祈求就可以消災解厄。

環島遊主要景點就係去島內的三個神社：邊津宮、中津宮同奧津宮，合稱「江島神社」。江島神社建於西元522年，當時主要拜祭海運、漁業同交通等三個守護女神，分別係邊津宮供奉嘅「田寸津比賣命」、中津宮供奉嘅「市寸島比賣命」和奧津宮供奉嘅「多記理比賣命」女神。

提提大家，如果大家影相係可以影神社外邊，但唔好影到神社內部，一嚟好多神社都禁止咁做，驚會褻瀆神明；二嚟好驚會影到靈異照片，所以我自己從嚟都唔會影神社內部，奉勸大家亦唔好咁做。

邊津宮旁邊就係江の島超出名嘅龍宮大神—錢洗白龍王！

洗錢方法好簡單：只要將散銀放在小竹籃裡，然後用水池入面嘅「弁財天黃金淨水」洗一洗，再將洗過嘅錢放入銀包做御守就可以招來財運喇！（記得以前都曾經喺京都金閣寺洗過錢。）

除咗洗yen之外，我梗係要洗下港幣先得喇！係咪？HAHAHA！另外，白龍王像前面仲有納奉箱，如果錢幣一投即入，就代表會願望實現！Yeah! 真係俾我一投即入！好友投咗兩次先入。

嚟得呢度大多數人都係求財嘅，但是白龍王衪就話，財可求但係心不要過於汲汲營營！所以用黃金淨水洗錢除咗可以提升財運，仲可以淨化心靈。

很多情侶來邊津宮祭拜保佑姻緣！廣場上綁滿咗繪馬，上面寫滿大家嘅心願~

喺呢度可以見到江之島大橋、整條參道同神社鳥居。

邊津宮隔離仲有奉安殿同八坂神社。記得先拜咗八坂神社，再去奉安殿。

「奉安殿」係一座極為罕見的八角形神社，專門供奉弁財天。睇落唔大卻係日本三大“弁財天神社”之一。弁財天是七福神之一；亦係其中唯一嘅一位女神明，因此備受日本人敬奉。

辯才天（日文弁財天，簡稱弁天）象徵口才、音樂與財富嘅女神。因為「才」、「財」同音，兼具帶來財富嘅意味，「辯才天」於是亦寫作「辯財天」。「辯才」二字也指說話能力、論辯能力，被認為是象徵辯才嘅女神。隨著佛教吸納引進，日本嘅辯才天也承繼了喺印度信仰中嘅河神身份，而河流嘅水聲令人聯想到音樂，推演出音樂神、福德神、學藝神等豐富嘅神格。

辯才天聖像有二臂之身及八臂之身兩種。八臂像嘅形象來自《金光明最勝王經》中「大辯才天女品」，八隻手臂分別執持弓、箭、矛、鐵輪、絹索等聖物，以前鎌倉時代係供奉“八臂弁財天”，專祈戰爭勝利。到了江戶時代轉變為“雙臂弁財天”，二臂之身嘅辯才天則手持琵琶，形象嚟自密宗兩部曼荼羅之一，象徵藝術與音樂，亦塑造日本大部分神社中接近天女、菩薩形象的外表。