究竟點去山中湖＋忍野八海，交通情況係點呢？
我哋喺山中湖平野車站搭0907嗰班富士急巴士(頭班車），雖然呢班車ge終點站係河口湖站，但我哋會首先去咗忍野八海，再番河口湖站搭高速巴士番新宿。（前一日我就已經買好番新宿ge車飛，當時完全唔記得可以喺富士山站搭高速巴士番新宿。不過好彩我喺河口湖站搭，想知點解，下面話你知！）
大家記得從巴士後門上車，有Suica card就先嘟一下，落車再嘟多一下。如果冇Suica card，記得要落飛，落車俾錢！巴士上經過見到山中湖ge標誌！唔好問富士山去咗邊，我都好想知！！！
下面呢個車表好好好緊要，除非你唔怕露宿街頭！因為錯過咗一班車有機會要等幾個鐘先有下一班，如果你錯過尾班車就真係幫唔到你，因為連的士都超難叫，最近都要由富士吉田過嚟！（車表可以喺各個大站同各觀光案內所索取，又或者上富士急巴士網站，仲有我上篇文章都有講。）
除非大家嚟山中湖會去幾個景點，我先建議大家買呢邊geふじっ湖号2 -day pass周遊券, 否則搭富士急巴士就得喇！我自己都係搭巴士。
去忍野八海一定要注意，大家可以喺4個車站上落車，（但千歧唔好喺忍野しのびの里落車，係離忍野八海好遠）！忍野八海、忍野八海入口、忍野入口加埋淺間神社站，總共4個車站都可以去到忍野八海，所以喺check車表時一定要小心自己要喺邊個站上落車！事關唔係每一站都會停車ge，所以一定望清楚！
忍野八海同埋忍野八海入口呢兩個站較少班次會停站，特別係忍野八海入口，所以建議大家喺另外2個站上落車穩陣d！
如果大家好似我咁帶埋行李，記得一定要喺忍野入口呢個站落車！因為呢個站係最近忍野村觀光案內所，可以將行李寄存喺度！
好彩嚟到終於冇再落雨！感謝各路神明！！！
一落車見到上面個指示牌，而對面路口寫住忍野八海，就可以向箭嘴方向直行！
直行3mins，就會見到忍野村觀光案內所！
忍野村觀光案內所ge服務超好，工作人員好nice、好熱情！最好ge仲喺大家可以免費寄存行李！案內所有一排locker，只有用100yen就可以鎖好locker，當你拎番行李，100yen係會退番俾你㗎！好似我fd帶咁鬼大個行李箱，放唔入locker點算好？案內所係會幫你看管住㗎！係咪好好呢？
放好行李，我哋可以開始輕鬆遊覽忍野八海。由忍野村觀光案內所左手邊個路口一直行2分鐘就會見到忍野村。
忍野八海是位於山梨縣忍野村的湧泉群，所以大家嚟到係名副其實ge睇水。好耐好耐以前，忍野村ge所在地為宇津湖，延曆年間(西元800 – 802年)富士山火山爆發，其流下的熔岩將宇津湖一分為二，而成了山中湖及忍野湖。
富士山麓ge平原同御阪山系之間ge峽谷因河流侵蝕同挖掘排水而干涸，但是富士山的伏流水仲殘留著可以溢出作為泉眼的湧水池。
而具有代表性的湧水池分別係 : 湧池、出口池、御釜池、濁池、鏡池、菖蒲池、底拔池、銚子池，亦就係宜家我們所見到ge忍野八海。
位於富士山北東山麓的忍野八海因水質良好、水量充足、保存情況完好、景觀優美，1985年（昭和60年）被環境廳（現 環境省）選定為全國名水百選，也是日本國的天然紀念物和新富岳百景之一，因而聲名大噪，而成為觀光勝地。
我哋行經鏡池時，竟然見到有個跟旅行團嚟ge內地阿伯吐痰落去，嗰下見到真係超嬲！激到我即刻喝停佢，仲勁惡咁鬧咗佢！內地人冇公德心鍾意污糟邋遢咪留番喺內地囉，點解要去破壞人哋國家ge環境呢？真係乞人憎到極點！
由於富士山被日本喻為神山，而富士水流下的湧泉自然被稱為神水!
山梨富士吉田市係著名的「徐福傳說」之地。傳聞秦始皇命徐福渡海尋找長生不老之仙藥，據說，徐福最終到達的地點是賦有「長生不老之泉水」美名的富士吉田。富士吉田市北口本宮富士淺間神社裡，設有徐福紀念碑。
忍野八海的湧水，是富士山高地的融雪及雨水，流到地底的熔岩地層，經過80年歲月的過濾及沈澱而形成的清徹泉水，再由八個池所湧出，平均水溫只有13度。
湧池旁的一處湧泉，牌上寫的是“來自富士山的融雪”，「湧水の手入れ３０秒に挑戦」，大家可以試下挑戰將手放入泉水中30秒，我試過水溫，超冰涼! 大家亦可以喺度飲用富士山泉水！
喺御釜池好明顯見到湧泉口，真係好似一個御釜，泉水好清澈，顏色好靚。雖然八個湧泉望落好似好平靜，唔似我見過ge湧泉，d水會向上湧出，但其實真係水源充足㗎！
兩岸種滿咗櫻花樹，可惜櫻花仲未開，唔係一定會好靚！不過呢度遊客不算多，好山好水，空氣清新，淙淙流水，慢慢散步，好舒服好寫意！
忍野八海地址：
Shibokusa, Oshino, Minamitsuru District, Yamanashi Prefecture 401-0511 日本
留言列表
