富士山下住宿ラコストリ山中湖 Lucustre Yamanakako
山中湖係富士五湖當中標高最高,湖的面積係最廣闊,亦係五湖中最近富士山ge,但係富士五湖中水深最淺ge。從以前就以避暑勝地而聞名,附近有好多小木屋、別墅同民宿。從山中湖可以見到的富士山,左右描繒出長長的山脊,看起來好女性化、好有魅力。每年11月同2月,喺北邊也可以觀看到鑽石富士。
舊年喺fb見到有blogger住喺ラコストリ山中湖 Lucustre Yamanakako,影到超靚ge富士山,所以就決定嚟富士山都要住呢間民宿!
點知咁唔好彩,原本想喺黃昏前嚟到民宿,因為plan咗要坐嗰班車唔知點解cancel咗,搞到要搭八點ge尾班車。雖然由富士山站搭車去到平野只需要35分鐘,但天都已經黑晒,完全望唔到周圍有咩景色。
我知道山中湖有好多民宿,但唔知道多成咁,喺平野車站ge地圖上見到有超過一百間!我哋平野車站(總站)落咗車,四周圍都好黑,好彩車站隔離有間24小時營業ge 7 仔!
我哋跟住GPS行,而我哋亦知道民宿位於湖邊,民宿網頁上寫咗只係距離車站10分鐘路程。其實條路並唔難行,只要背向住7 仔(即係6點鐘方向),向住12點方向嗰條大路直行,行3分鐘見到對面馬路(右手邊)有間神社,就係山中湖 平野天滿宮。
而左手邊有條碎石小路,只要轉入呢條小路一直行到尾,山中湖就會出現喺面前。(小心唔好太興奮跌落水,因為湖邊冇欄㗎!)我哋去到已經漆黑一片,完全見唔到富士山。
然後向右行10步就會見到 Lucustre Yamanakako !(其實由車站拖住行李去到民宿都只係6-7分鐘)
呢幾張相係我第二日補拍ge。民宿ge outlook就係咁喇!
同富士山玩咗成日,一嚟到民宿,好似有種番到屋企ge感覺。
民宿老闆夫婦好好,我哋喺河口湖知道原定坐班車會取消,站內ge information center主動幫我哋聯絡咗佢哋,通知佢哋我哋會夜到。當我哋一嚟到,老闆好熱情出來招呼我哋,幫我攞行李上房,仲話晚餐已經為我哋準備好,隨時可以去到餐廳食ga la。
其實民宿喺1830客人就可以開始食晚飯,我哋去到餐廳嗰時已經係2020,其他客人已經全部食完飯,得我哋兩個人包場。每個房間ge客人都有指定ge餐枱,兩餐都坐同樣位置,枱上會有客人姓名,絕對唔會搞錯!
餐枱已經擺設完畢,老闆見我哋坐好,就幫我哋點著個小火鍋,仲攞埋焼き物(用瓷器裝住嗰d)同甜品出嚟!
是日晚餐非常豐富,有前菜(刺身)、自家製醬菜(3款)、野菜肉丸餃子鍋、鴨胸、焗魚、焼き物(有炸紫菜卷、炸青椒同炸茄子,上面淋咗醬汁),仲有和果子做甜品。
食物好有家庭風味,簡單、清淡。我自己覺得焗魚同醬菜係最好味ge。我平時唔鍾意食筍,因為筍有d澀味,加上食筍對皮膚唔好,所以唔會食,但民宿做得超好味,完全冇澀味。食到一半,老闆出嚟問我哋食物啱唔啱口味,我仲請教咗佢點可以整到d筍冇晒澀味添!跟住連老闆娘都有走出嚟同我哋打招呼!
最後,飯桶本人當然仲食咗茶泡飯作結啦!飽飽!好滿足!
食完飯,我哋番房整理咗吓行李,決定出去散散步,越夜四周越嚟越大霧。
我哋行番去車站隔離間7仔,完全被濃霧包圍住!嗱!呢d先叫做仙氣㗎嘛!
見到有得賣富士山特別版汽水,點都買嚟試吓啦!奉勸各位,內含雷味,伏已中,勿試!
離開7仔,外面霧氣更加濃,更加清涼,室外只有幾度!山中湖湖面上面飄住一層霧氣,整個感覺好似走入宮崎駿ge世界咁!
民宿有暖氣,但對於怕熱兼吹慣冷氣ge我,間房真係太暖兼好焗,連好友都頂唔順!我搞咗一輪先整到變番冷氣。(不過成個trip都發現好多地方仲係開暖氣,使唔使啊!!!)
最鍾意間房夠晒大,方便我開行李搵嘢!我book ge呢間房係民宿最新,亦係唯一ge一間洋室。民宿只有兩間房連浴室,原本想book和室10疊連浴室嗰間房,但俾人book咗,所以就book呢間。不過好彩book咗呢間房,所有嘢好新,超舒服!
仲有大浴缸等我可以浸浴,加埋我ge私伙浴鹽,perfect!
浸浴完,當然要好好休息,因為我plan咗第二朝5點起身影日出+富士山!因為喺網上見到有網友影到日出時份超靚富士山,但我就咩都影唔到!點解?
點知第二日清晨一直落雨,所以完全見唔到富士山!不過其實之前一直check住天氣預報,都係講會陰天,尋晚check咗係陰天有驟雨,加上我用慣嗰個天氣app超準,所以期望唔大!醒咗即時衝去窗邊,見到咁情況,梗喺番瞓啦!亦因為咁,我可以瞓多2個幾鐘!
起身後,整理好自己同行李,外面當然繼續落雨,而今日ge行程都係冇瓦遮頭,好煩啊!
一見到咁豐富ge早餐,心情即刻好番好多,有d咩等我食飽再講!最鍾意食日式早餐,一早就有飯食,好幸福!
食完早餐,我哋就check out繼續下面ge行程,向忍野八海出發!老闆真係超好,見到出面落住雨,再加埋啱啱仲有一對老夫婦都check out去車站搭車,所以開車送我哋去車站!
喺ラコストリ山中湖 Lucustre Yamanakako 一泊兩食,仲要係住我哋嗰間房(已經係最貴),都係$600(港幣)一個人,我覺得值ge!再去我會再住!
ラコストリ山中湖 Lucustre Yamanakako
http://yado.mine.co.jp/lucustre/index.html#lbl_lakeresort
留言列表