（住宿）First Cabin Akihabara Hotel（秋葉原）
好多人都知，搭羽田ge凌晨機可以去機場ge First Cabin瞓capsule！但其實First Cabin喺東京除咗羽田，仲有4間分館。今次我會揀咗位於秋葉原呢間試住一晚！
距離秋葉原站昭和通出口只係3分鐘路程（拖住行李），交通非常方便！出咗昭和通出口，過斑馬線都對面馬路，向右行到第二個街口轉左直行1min就到First Cabin！
First Cabin Akihabara有兩種房型，一種係頭等艙，一種係商務艙。酒店一共有149個艙，男性專用艙有99個，女性專用艙有50個 （我數過，其實唔止）。不過頭等艙數量真係好少。
我大概個半月前喺First Cabin個website訂房，好幸運book到兩間女性專用頭等艙房型。入住前兩日會再次收到email confirm booking！
一入去Lobby，酒店職員好nice咁核對完資料，會收咗錢先check in，頭等艙房型一晚係5100yen （會因月份有唔同收費，商務艙係4500yen左右，有時會做割引！）。然後俾房卡同鎖匙我哋，同埋會簡單講解設施用途。
Lobby右手邊係common room，因為房內唔可以食嘢，所以食嘢要喺度食！左邊係兩部電梯，男左女右，因為男女樓層係分開ge，電梯只會停喺各自專屬樓層！
女性專用電梯必須要女性房卡拍卡先可以使用，就好似想進入女湯都一定要女性房卡拍卡。（唔知用男性房卡拍卡得唔得㗎呢？？？驚！！！Haha! 應該唔得ge！）
見到呢個就代表要拍卡喇！
我哋嗰日被安排入住喺3樓，其實2樓都係女性專用樓層，應該係full咗先開埋3樓。我數過淨係2樓都有50個艙。3樓嗰日開咗半邊樓層，一共有24個艙。2樓一共有8個頭等艙，而3樓就有6個。入住當晚，3樓都full晒！
一出電梯，轉左有嘢飲機同locker，在行前少少就見到艙房走廊。
前面嗰d全部都係商務艙。商務艙有2.5㎡，張床闊100cm！內部就係好似下面幅相咁，所以有行李應該係要寄存或鎖喺locker度。由於個人覺得太細，如果當初book唔到頭等艙，就唔打算試住。床邊個黑色櫃係俾你擺貴重物品，可以上鎖ge！因為個簾只可以拉到落地，冇得鎖！但就我所見，其實個個都係拉到遮住自己。
一直行到走廊盡頭就係頭等艙，一共6間（左右各三間）。
頭等艙有4.4㎡，張床有120cm闊，有張檯俾我放嘢，仲有電視添（掛喺床尾上面）！最重要仲係可以俾我打開晒個行李箱。東京好多酒店都做唔到！床上面有睡衣、大細毛巾各一條，同埋牙膏牙刷。除咗枕頭，仲有紅色大cushion，good！因為我認床，而我自己張床都有，真係啱晒我。
房門係趟門，趟好有磁力關好，但一樣冇得上鎖。所以貴重嘢可以放喺床下面個櫃桶鎖好。我個人覺得磁力趟門合上咗，都真係要幾用力先開到門，再加埋係尾房，都好安全。
關於洗手間同浴室，每一層都有化妝間同洗手間，3樓化妝間係連埋洗手間，2樓化妝間連浴室，洗手間係分開ge！係啊！女性浴室只有2樓有，所以我哋係要去2樓沖涼㗎！浴室只有3格，所以有時要等一陣先有得用！浴室外就有洗衣機同乾衣機，使用一次分別200yen 同100yen！
雖然住係3樓會因為沖涼問題有少少唔方便，但我都係鍾意住3樓！因為2樓好吵，俾3樓吵好多，一嚟多人住（香港人同台灣人講嘢真係好大聲），二嚟2樓係有每條走廊都係通到去另一條。3樓就唔係ge，得一條路，唔係住頭等艙係唔會行到入嚟裏面，所以真係靜好多！（但其實2樓有交談室，隔音仲唔錯添，講嘢大聲唔該去入面。）
First Cabin喺lobby隔離設有大浴場，分男湯同女湯，一出電梯轉左直行，首先係男湯，最入係女湯。進入女湯必須拍卡，入咗去電子鎖會自動上鎖，好安全！
浴場唔算好大，亦唔算好多人用，唔似得男湯咁多人用、咁熱鬧（唔好問我點知，反正我就係知）！只要教啱時間，想一個人包場絕對冇難度！
呢個係3樓ge化妝間，有三個位，夜晚喺唔使等位ge，朝早就可能有機會要等喇！（不過我同好友都唔使等）
我最愛係呢度基本女仔要用ge嘢，呢度都有！化妝棉、棉花棒、剃毛刀、風筒有齊！
卸妝油、洗臉泡泡、化妝水、乳液都有齊，係日本國民品牌 Shiseido出品。
而最最最令我驚喜ge就係竟然有直／捲髪器，我把稻草頭髮多得有佢，第二日先見得人咋！超級好用，搞到我勁想買番香港！
走廊前面有一d基本用品，大家可以根據自己ge需要自行攞去用！
住咗一晚，我覺得First Cabin Akihabara ge CP值好高，我覺得好適合短期入住1～2日。因為第二日會去富士山玩，仲會住一晚先番嚟東京，所以就book咗First Cabin宿一宵！如果下次去飛東京，仲會去其他地方，咁First Cabin真係短暫停留最好ge落腳點！
留言列表
