原宿／表參道／天丼てんや
完成去御苑賞櫻呢個行程之後，我哋嚟到原宿。原宿、表參道到涉谷一帶都係東京年青人ge蒲點，仲要係星期日，所以真係好多人，就好似旺角一樣多人。
真係多人到嘔，有人群恐懼症ge本人見到咁鬼多人真係好想暈。就連一直通去表參道ge各條大路小巷都塞滿晒人。你講，點會唔迷失表參道呢？
最最最恐怖、最最最多人ge梗係原宿竹下通Takeshita Street啦！無論係東京當地ge年青人，定係其他嚟東京修學旅行ge日本年青人都一定要嚟呢度朝聖，咁點唔多人啊？！
講開又講，以前聽人講過，東京女仔唔識打扮唔靚，反而大阪女仔仲識打扮。其實每次去大阪，我都覺得大阪d女仔好識打扮自己，身形又好；京都女仔打扮比較斯文，北海道就真係幾老土喇！
今次嚟到東京，d女仔打扮一係就太有個人風格（但完全唔靚），一係就太普通（成街都咁著）。佢哋好多人都鍾意著乾濕褸，仲要所有都淨係著杏色。於是我同我fd講，我唔敢著我件乾濕褸，因為驚走散咗，你搵唔返我。
行完嗰幾條最多人ge街，我哋直踩落澀谷。不過，都嚟到下午茶時間，我哋需要醫下肚先！因為真係餓，我哋決定食d飽肚ge野。所以就去咗專食天婦羅丼ge連鎖店－天丼てんや！
雖然係連鎖店，價錢不算貴，但質素一d都唔差。最出名係海老，即係大蝦，一定要食！我哋去到時都要等位，店內唔算大，一邊係對住開放式廚房ge bar檯，一邊係四人檯。如果客人自己一個人就會被安排坐bar檯，兩個人或以上就會坐4人檯。因為唔會搭檯，所以要等位。
不過凡事總有例外，我哋等緊檯時，排喺我哋後面有個日本婆婆，佢得一個人，店員揚手安排佢坐去bar檯，然後再安排我哋坐4人檯，點知佢一個唔該就坐低咗喺我哋對面，嗰一刻我真係shock咗！就係咁，我成餐飯就對住個古怪婆婆了！
雖然我有選擇困難症，但我最鍾意試新嘢，所以叫咗春季限定ge櫻海老天丼set，即係980yen嗰款，配Udon。唔知係咪餓到傻咗，我竟然完全見唔到ge set係連飯～不過宜家去，可能已經冇咗呢款嚕！
個丼d天婦羅上面仲淋滿燒汁，食完一定飽到爆！每一樣食物都好好味，海老，櫻海老餅（櫻花蝦餅）、瀨戶內海產ge黑海苔、野菜，仲有我覺得最好味ge白魚。除此之外，跟餐ge Udon都超有水準，驚喜，正！
好友叫咗元祖オールスター配蕎麥麵，天婦羅有海老、魷魚、菇、豆、藕片、茄子，一樣炸得勁脆又唔油，名符其實ge皮薄餡靚，但蕎麥麵有D over cook！
不過最重點係佢個set係冇飯，而我個係有飯。我問佢點解明知我個set係連飯都唔阻止我，佢竟然話以為我太餓先叫！OK！我知我係飯桶，都唔使咁啊？！而最sad ge位係，我竟然真係食得晒～～～果然飯桶去到日本都係飯桶！
天丼てんや 有好多間分店，而且除咗基本ge丼之外，仲會不斷有期間限定ge丼㗎！
下次去日本可以去試試！ http://www.tenya.co.jp/
留言列表
