新宿出發！2016年去富士山最update交通情報
（左邊係JR南口，右邊係新高速巴士總站）
第二朝8點45分，我哋去到新宿車站，準備喺新宿高速巴士總站搭京王電鐵巴士集團ge中央高速巴士前往富士五湖。出發前往富士山嗰日，正正就係新ge新宿高速巴士總站（バスタ新宿）啟用ge日子，亦即係JR新宿南口對面，如果出新南改札嗰個出口就啱了（記得一定、一定要出呢個出口，因為最近，又有扶手電梯）！
新宿高速巴士總站（バスタ新宿）隔離相連ge新shopping mall係叫NeWoMan!
我喺香港已經check好咗資料，亦見到個新車站，第一日就仲行經過佢。但始終有d唔放心，話晒都係第一日啟用，於是我fd就叫我去新宿JR Information center問清楚！（因為去咗日本咁多次，試過好多次問JR D職員都俾山埃答案，最離譜嗰次係去立山黑部，搞到成個行程瀨晒嘢！）
但既然佢叫到，雖然我唔多情願，但最後我都係問咗！我好肯定自己問得好清楚，對方係完全明白我ge意思，Information center個女仔好肯定咁答我要去西口搭，跟住我問佢聽日出發唔係要去新車站搭咩，佢再次好肯定答我要去西口ge度搭車！於是我就信咗佢！
臨瞓前特登上網check好咗朝早0915有一班開去富士五湖ge巴士，雖然之後仲有其他班次，但因為由新宿到河口湖要大概個半鐘，我想早d去到，可以有多d時間玩。
當我0845去到新宿西口，出西口方向係要抬個行李箱上樓梯，冇扶手電梯，東京人絕大部分都很冷漠，唔似我去日本其他地方，一定有人幫手！
一出西口，嗰度有好多巴士站，但竟然完全見唔到有去富士山ge高速巴士，冷清到呢！！！搵咗一陣都唔見，俾我見到兩個警察伯伯，於是即刻衝埋去問啦！佢哋就叫我去新車站，話今日搬咗過去，仲教我點行過去！於是我話我知點去，然後向佢哋道謝，就即刻衝番去新車站喇！
好衰唔衰開始落雨wor！仲越落越大！搞到我哋又要開遮，又要拖住行李暴走！成個癲婆咁！已經好嬲了！
去到位於4樓ge新車站，一出lift，喺個好窄ge通道位竟然有塊大screen show晒d車ge timetable出嚟，於是一大班人塞喺嗰度，阻住晒條路！嗰個位淨喺夠1個人拖住行李箱過！好唔容易過咗最窄個位，前面有一堆cam拍住個新車站！話晒第一日啟用，作為傳媒人，我完全可以理解佢哋要交功課！但真係唔應該阻礙到其他人！
終於入到車站大堂，超級多人，我梗係即刻衝去買飛啦！點知條隊好長，於是我就去自動售票機買啦，點知部嘢好鬼複雜，係連車站ge工作人員都搞咗好鬼耐，搞到我眼白白見住架車大把位但就咁開走咗！嗰一刻，我真係真係嬲到一個點！一心想買下一班10點幾嗰班車，點知已經冇晒位。搞到我哋要買11點幾個班，仲要係最後兩個位！嬲到就嚟爆啦！
我火滾到差d衝去d媒體度接受採訪，等佢哋報導吓佢哋個新車站啟用係幾咁混亂，所有ge配套都未做好，工作人員完全唔熟所有嘢！
為咗唔好俾我ge起床氣同飢餓感影響到我ge情緒同形象，我決定去食番個早餐！嗰時都未夠9點半，商場又未開，我哋唯有去食我哋見得最多ge，仲多過便利店ge Starbucks，多到好似唔使俾租咁！總之喺車站隔離就有一間喇！
不過呢，雖然都係Starbucks，但一眼就知日本俾香港正好多好多啦！種類多、味道好，仲要平過香港wor！咁又係ge，香港Starbucks係under邊間公司先得㗎？點同日本比？！
好好咁食完早餐，叉足電，可以安心上路，向富士山出發！
臨上車時，竟然遇到車站宣傳人員派發紀念品！Design係幾靚，但其實d紀念品好似唔關新車站事。
前幾日見到有網友去咗，發現配套已經做好， JR站內ge指示牌亦已經updated！
留言列表
