江之島•湘南海岸•鎌倉一日遊（6） －東京近郊日歸小提案
唔睇大佛嘅古都鎌倉遊－極樂寺站＋極樂寺＋成就院＋御靈神社
完成咗嚟鎌倉高校前睇《男兒當入樽》場景，我哋繼續搭江之鐵前往極樂寺站！
當江之電離開七里之濱站後，漸漸遠離海岸線，嚟到極樂寺站時，車站周圍已換上翠綠嘅山林風景，從車站仲可以清楚看到穿過山林隧道嘅列車軌道。
由於擁有造型非常古老嘅木造站房，所以極樂寺站喺1999年時獲選「關東車站百選認定」。
如果大家有睇《海街Diary》，相信一定記得故事背景就係喺鎌倉。大家亦一定會知道極樂寺站（極楽寺駅）。有冇即刻記起綾瀨遙同妹妹等車嘅畫面呢？除此之外，呢度亦係日劇《最後から二番目の恋》（倒數第二次戀愛）嘅重要場景。
行出車站往長谷方向走，會看到江之島電鐵沿線唯一的隧道：極樂洞（「極樂洞」隧道西端口）。
極樂寺正正位於極樂寺站後方，但要從車站兜出嚟，行大概兩分鐘就會到達極樂寺正門（山門）。
極樂寺（ごくらくじ）係位於日本神奈川縣鎌倉市嘅真言律宗寺院。歷史悠久嘅極樂寺建立於1259年，寺內古意盎然，更曾見證鐮倉幕府時代。境內以「極樂寺境內・忍性墓」被指定為國之史跡。 極樂寺內唔準影相或錄影，《海街Diary》可以喺寺內取景拍攝都係經過特別申請。連入寺的門口（圖右）做得相當矮細，進入時一定要彎腰，咁做係希望遊客可以謙卑進入寺內參拜。
離開極樂寺，我哋準備前往下一個目的地－御靈神社。御靈神社位於極樂寺站與長谷站之間，兩個站只係相差850m，等車都要10mins，咁就索性行啦！我成日相信有D風景係要自己行經先會見到！（遠處右上方嘅樓梯就係通往成就院嘅西結界樓梯！） 結果就路過呢間小白屋，咖啡店除咗提供餐飲外，外面擺放著湘南海岸嘅明信片與窯燒作品寄賣。
明信片係店主老先生嘅朋友山田先生嘅水彩作品，咁靚，我梗係買咗俾自己同送俾同事、朋友啦！
呢條樓梯就係通往成就院嘅西結界樓梯！成就院雖然細小，但喺夏天時會開滿紫陽花（繡球花），由於當時仲未開花，所以我並冇入內參拜。不過，我喺心裏面同自己約定，某年初夏，我一定會再次嚟到鎌倉賞紫陽花。 我哋繼續向前行，往御靈神社進發！
沿路僻靜冇咩人行，好彩有標示指引方向。
御靈神社起源於呢一帶大庭、梶原、長尾、村岡、鎌倉等平氏五家供奉先祖嘅神社，當初名為五靈神社，歷史比鎌倉幕府時代更加久遠。世代交替，宜家嘅御靈神社主祭神係鎌倉權五郎景政公，因此又稱被為權五郎神社。
神社仲供奉咗鎌倉七福神中嘅福祿壽，到訪時見到嘅都係附近居民前嚟參拜。
御靈神社嘅鳥居設喺踏切旁邊，要進入神社嘅參道必須穿越鐵道。所以御靈神社係好多鐵道迷同攝影愛好者必到之地。
唔知大家有冇發現神社係斜㗎呢？！冇錯！唔係我嘅攝影技術唔好，而係因為地勢關係，神社真係斜㗎！其實由極樂寺站一直行過嚟就會發現呢一點。仲有就係附近一帶嘅地勢好低，只有海拔6.8m，有D甚至更低。好擔心如果不幸發生海嘯，附近嘅居民點算好......
其實除咗紫陽花季，櫻花盛開嘅時節同每年9月18日舉行例祭「面掛行列」期間都係到訪神社嘅最佳時機！
御靈神社內有一株見證歷史、伴隨歲月一同成長嘅巨大神木（鳥居右邊），令境內綠蔭滿庭，舒適清幽。
比起紫陽花季嘅人頭湧湧，個人反而覺得櫻花花季到訪御靈神社更加能夠感受到境內嘅清幽古樸。
走過御靈神社嘅鳥居，見到眼前嘅正殿，被兩邊嘅櫻花包圍住，有種無法形容嘅靈性美，好像櫻花樹守護住正殿一樣。
神社嘅正殿供奉以勇武見稱嘅武將鎌倉權五郎景政公。大部份參拜者都係祈求可以擁有景政公一樣嘅意志，希望做事能夠貫徹始終。
作為《海街Diary》嘅重要場景，神社前平交道多次出現喺電影中。
日劇《最後から二番目の恋》（倒數第二次戀愛）之中，和平（男主）同千明（女主）放工回家相遇，多半都係以呢度作為背景。
就算唔係為咗日劇或者電影場景而嚟，御靈神社踏切亦係江之電鐵道著名場景之一。民居旁邊嘅小巷延伸為參道，並橫越江之電鐵道， 鳥居前就係平交道口，非常特別！尤其喺六月紫陽花季時，能夠同時捕捉神社、江之電與紫陽花於一景，交織出屬於鎌倉初夏嘅風物詩。
神社前嘅鐵道山洞名為極樂洞，呢度就係極樂洞隧道東端口，另一側出口喺極樂寺站西端口。
當交通燈亮着、警示聲響起，黃黑相間嘅欄柵放落嚟，江之電嘅列車緩緩駛過， 兩側遊客紛紛攞起相機，不愧為江之電著名場景之一。
極樂寺
拜觀料：無料
拜觀時間：8:00-16:30
地址：日本神奈川県鎌倉市極楽寺3-6-7 (江ノ電極楽寺駅步行2分)
成就院
拜觀料：無料
拜觀時間：8:00-16:30（6月17:00）
地址：鎌倉市極楽寺1-1-5 (江ノ電長谷駅步行10分)
御霊神社（ごりょうじんじゃ）
拜觀料：無料
時間：9:00~17:00 地址：神奈川県鎌倉市坂ノ下4-9
交通：江之電長谷駅步行5分
江之電極楽寺駅步行15分
留言列表
