江之島•湘南海岸•鎌倉一日遊（5）－8日8夜東京上山下海花見之旅 Day 4
東京近郊日歸小提案－湘南海岸＋鎌倉高校前站（男兒當入樽取景地）
離開江之島，我哋又番到江之島站搭江之電去鎌倉高校前站。大家記得唔好搞錯方向，喺向鎌倉方向先啱㗎。
嚟日本咁多次，我好鍾意鐵道遊，所以知道佢哋第一節車廂通常可以睇到駕駛室。所以我特登揀咗第一節車廂嘅靚位。越過駕駛員嘅身影，見到電車沿著鐵軌運行，感覺真係好正。
我好鍾意呢種特別嘅視覺享受！
嗰一瞬間我好似唔祇係乘客，望住窗外掠過嘅風景，
更加似係親身駕駛住江之電準備開始一段穿越時空嘅奇異旅程。
要前往充滿古雅風情嘅鎌倉，當然唔少得江之電。行駛咗超過一個世紀嘅江之電，唔單祇係交通工具，沿途有山景又有海景，仲會穿梭喺民居同鬧市之間。啱晒我呢個鍾意上山下海嘅旅行魂！搭著搖晃喺鐵道上、小路間穿插嘅江之電，種種風景將搭車變成一種樂趣！
江之電穿過大街小巷後，右手邊出現咗蔚藍色嘅海岸線，我們終於抵達傳說中嘅湘南海岸。湘南海岸亦有「東方邁亞密」嘅美譽，夏天時有好多遊客嚟到盡情享受海上運動。
從月台上見到一望無際嘅大海已經令人好興奮！
鎌倉高校前站係「關東之站百選認定站」～
終於嚟到鎌倉高校前站，內心好激動，小時候嘅回憶不斷喺腦海中翻湧！
出站後第一個路口就係江之電最著名嘅攝影熱點，SLAMDUNK《男兒當入樽》片頭曲其中一幕就係以呢度作為場景，吸引咗好多人嚟到此一遊。
相信有睇過《男兒當入樽》嘅朋友，對呢一幕、呢一部電鐵絕對唔會陌生！
櫻木花道與晴子，耳邊好似即刻響起 《男兒當入樽》主題曲 ～ （台譯：灌籃高手）
細細個嗰時，曾經因為某波牛而睇嘅一套動漫!
多年後終於可以嚟到呢個夢幻場景~完夢
雖然湘南海岸沒有湘北高校，
但當鎌倉高校穿着制服嘅學生經過身邊時，令人不其然代入了《男兒當入樽》！
我自己對呢架由奶油色與墨綠色組成嘅江之電情有獨鍾。
當日到訪時，人唔算好多，有台灣人、韓國人仲有兩個香港人（我哋），咩年齡層都有！其實女士比男士多！幾個台灣嬸嬸特別顯得好興奮，我覺得佢哋好似翻番自己嘅少女時代咁樣。
以前見到喺海岸邊行駛嘅火車，總會令我聯想起夏天午後嘅悠閒慵懶。應該談一場冇負擔嘅戀愛！
但當自己親自嚟到湘南海岸後，發現感覺喺唔一樣㗎！
喺香港，去長洲或南丫島俾我嘅感覺係一種悠閒寫意嘅歡樂；而湘南海岸卻帶俾我輕鬆中混和住淡淡嘅懷念感覺。
喺鎌倉高校前站留咗幾長時間，離開時仍然有d依依不捨，但感覺上又有d輕鬆。就好似打開咗time capsule，原來我喺湘南海岸留下咗某種回憶，宜家又帶走某種新嘅感覺。
喺鎌倉高校前站，心中就係哼住幾首《男兒當入樽》嘅歌曲，當然唔少得主題曲 《君が好きだと叫びたい》（想大聲說我喜歡你），眼前好似睇住呢段片頭：
https://www.youtube.com/watch?v=iW4atnm_5h0
好熱血嘅感覺！唔知大家鍾意邊個角色呢？係傻氣熱血嘅櫻木花道？嚴格嘅大猩猩赤木？三井壽定係宮城良田？擁有肯德基爺爺般笑容但腹黑嘅安西教練？（個人唔鍾意流川楓～）
留言列表
