江之島•湘南海岸•鎌倉一日遊（7）－珊瑚礁 モアナマカイ店 （七里ヶ浜店）
離開御靈神社，我哋沿著江之電鐵路旁邊一直行，大概5mins就嚟到長谷站。
如果大家想嚟高德院參拜鎌倉大佛，又或者到長谷寺參拜都係喺長谷站落車。
我哋會由長谷站搭3個站到七里ヶ浜（七里之濱）食晚餐！
嚟接我哋嘅又係呢架喺1997年為咗紀念江之電95週年開幕式製造嘅「10形復古版」寶藍色江之電。
真係好鍾意江之電，見到呢D手繪畫地圖就覺得充滿人情味喇！
離開七里ヶ浜站，大概行2mins就會到達我哋嘅目的地－MOANA MAKAI 珊瑚礁 モアナマカイ店 （七里ヶ浜店）。
餐廳非常易認，因為一到黃昏就會點燃火炬。
嗱！見到咁嘅無敵大海景，相信唔使多講，大家都應該知道點解我會揀嚟珊瑚礁啦！
我嚟得遲咗D，所以只能抓住黃昏嘅尾巴！個人強烈推薦大家黃昏嚟到湘南海岸邊嘅珊瑚礁一邊享受美食，一邊睇日落。建議大家最好下午6點前到達，一嚟可以避開人潮，二嚟可以睇到超靚嘅夕陽靚景。
終於明白點解江之島被譽為「湘南之寶石」，晚霞中嘅江之島果然名不虛傳！
如果夏天、秋天天氣好，坐係露天座位一邊吹住海風一邊食嘢，真係超正！我哋嚟嗰陣係春末，入夜後氣溫明顯下降，加上有海風吹埋嚟，所以坐唔到喺室外。好友已經頂唔順坐咗入去餐廳等位，得我一個喺出面係咁影相。
餐廳使用落地大玻璃，所以無論室內室外都可以欣賞到無敵海岸景觀！
成間餐廳充滿異國情調，加上侍應生會着上帶有夏威夷風情嘅服飾，令人好似置身於度假海島。
餐廳座位好多，但客人更多，所以我哋等咗大概10mins先有位。好正啊！被安排坐咗喺嗰望到靚景嘅位，勁開心！（聽講夏天嚟閒閒哋要等半個鐘，好彩咋！）
出發前，我問過好友今次旅程有d咩想食，佢話好想試下日式咖喱，所以我梗係要滿足佢嘅要求啦！
千歧咪以為珊瑚礁只係食環境，餐廳有15款招牌咖喱（カレー）俾大家選擇，咖喱加入大量乳製品特別調製，口味濃厚順滑又唔辣。除此之外，餐廳仲提供多款前菜、salad、海鮮同肉類料理，總有一款啱你口味！餐廳仲有Drink Menu俾大家可以歎番杯。
蒜香炸薯條（ガーリックポテト）（650yen）幾乎每檯都order，好友見到即刻話要食。餐廳先將厚切薯條炸好，然後用平底鍋煮溶牛油，再放入炸薯條同灑上蒜蓉香草粉。好香口、好惹味、好熱氣，送酒一流，於是兩個原本講好是日唔飲酒嘅人最後都係叫咗酒。
好友點咗茄子肉末咖哩 （ナスとひき肉のカレー）（1350yen），好味道但比較普通。
唔好以為款款咖喱嘅顏色都差唔多，味道都應該差唔多！咁就錯喇！珊瑚礁講到明有15款招牌咖喱，即係話15款咖喱都係唔同味㗎！
有選擇困難症嘅我最後點咗浜豚（ハマトン）のカレー（横浜の養豚舎から入荷、限定生産ポーク）（1550yen）。好友其實要戒牛，佢又忍唔到口，我自己餐餐都食牛唔係咁好。加上女人就係咁，對「限定」呢個term完全冇抗拒能力。
呢款咖喱真係超好味！餐廳用咗浜豚嘅五花腩，切成厚薄適中嘅肉片，配埋特製咖喱，完全冇油膩感，食落口五花腩片肉質好軟滑，油香喺嘴入面爆開，而最犀利係咖喱冇搶咗肉嘅甜味，味道配合得天衣無縫。我哋兩個都覺得呢款咖喱超正！
珊瑚礁嘅食物分量偏大，唔好一次過叫太多。如果大家鍾意食咖喱，餐廳仲有即食咖喱料理包可以俾客人買走。
食完令人好滿足嘅一餐，離開餐廳時，天色已經全黑，我哋亦要踏上歸途。
最後送我哋番藤澤嘅，又係呢架「10形復古版」寶藍色江之電。
番到藤澤站，我哋搭番小田急番新宿站！
我哋嘅東京近郊日歸小提案－江之島•湘南海岸•鎌倉一日遊終於完滿結束喇～
珊瑚礁 モアナマカイ店 （七里ヶ浜店）－ （提提大家，珊瑚礁有三間店，兩間位於七里ヶ浜站附近，我哋去嘅係七里ヶ浜店，而唔係去本店。本店冇咁正係view！）
http://www.sangosho.net/moana.html
回程時，喺江之電上見到宣傳海報，原來江之電同台灣平溪線係姐妹電車，用「江之電一日乘車券」可以無償兌換當日使用之「平溪、深澳雙支線一日週遊券」進行觀光旅遊。不過計劃已經喺2016年3月31日完結咗喇！
留言列表
