箱根2日1夜精華全攻略-東京近郊春日遊(1) @ Jovus的美好頹廢時光

日本係一個各地都擁有溫泉嘅國家。而箱根，就係我第一個知道嘅日本溫泉度假勝地。箱根擁有優質嘅溫泉，仲可以眺望富士山美景，自然景觀更會隨著四季更替而展現不一樣嘅風情。箱根可以話係東京人嘅後花園，由於距離東京只係個幾鐘車程，好多東京人都鍾意嚟箱根過週末，浸溫泉放鬆一下。

箱根位於日本名山「富士山」山麓，讓您隨時都能從各角度欣賞富士山嘅風貌，自古以來一直係日本人最愛嘅觀光勝地。從江戶時代開始，箱根以溫泉嘅療效而聞名，逐漸發展成為庶民最憧憬嘅溫泉鄉，更是吸引了國內外無數旅客嚟觀光。

箱根同立山黑部好似遊覽箱根一樣可以乘搭多種交通工具: 小田急電鐵、箱根登山電車、箱根登山纜車、箱根空中纜車、箱根登山巴士、海盜船。記得購買箱根周遊一日卷 (Day Pass), 啱啱所提到嘅所有交通工具都可以使用。建議大家如果嚟箱根玩，一定要喺箱根住晚溫泉旅館，咁就舒舒服服，有充足時間遊箱根! 有朋友可能會問，如果要去箱根兩日一夜，得一日卷點算? 唔使擔心，一日卷係兩日內都可以使用㗎!

我哋從新宿搭乘小田急"浪漫特快"前往箱根，大約85分鐘車程就抵達箱根湯本站。

嚟到箱根同立山一樣，第一件事就係要寄送行李去留宿嘅旅館。喺箱根湯本車站內就有「箱根運送服務」，服務處位於從月台前往出閘途中嘅樓梯同lift中間。立山黑部寄送行李服務係劃一收費，但箱根係根據行李喼size而收費，好似我個喼雖然細少少但勁重，而朋友個喼大但好輕收得貴d。寄放行李後，就可以輕鬆地遊箱根。

搭乘浪漫特快號到達箱根湯本後，寄送完行李，直接喺對面月台等待往強羅嘅箱根登山電車。

箱根係日本國家指定嘅自然公園，大家可以搭乘火車漫遊。連接強羅和箱根湯本嘅箱根登山鐵路，係行走喺呢個日本數一數二斜坡上嘅知名路線。為了令火車喺陡峭嘅山坡上運行，箱根登山鐵路將路線設計為「之」字形，40分鐘嘅車程內有3處火車會調頭，向住強羅前進。

大家可以從行駛中嘅列車欣賞車窗外嘅景色。其中出山嘅鐵橋是沿途重要景點之一，從鐵橋俯瞰深達43公尺嘅谷底，將氣勢萬千嘅絕景盡收眼底。望住車窗外略過嘅風景，隨著四季遞移而變化嘅花草樹木交織喺宏偉嘅自然景觀中，令人嘆為觀止。

春天嘅粉櫻、秋天嘅紅葉…四時分明嘅季節風情，更添旅遊樂趣。箱根登山鐵路最佳嘅旅遊時間一定係5月，因為到咗繡球花開嘅季節，鐵路周圍開滿美麗嘅繡球花朵。

坐咗嚟到強羅站，我哋第一件事當然就係去搵嘢食啦！

其實整個箱根旅程中基本上都冇見到櫻花，就係除咗喺強羅車站一帶見到。

箱根擁有超好水質，所以造出嚟嘅豆腐非常著名，當然味道亦非常好。喺箱根強羅有間超出名嘅豆腐店，製作出來嘅豆腐香滑軟嫩勁好食！嚟到強羅一定要試下！

銀豆腐嘅位置好易搵，就係喺鐵道嘅另一邊。只要出咗強羅站穿過軌道再向左邊走前少少就會見到。銀豆腐外觀睇起嚟好似民居，有種鄉村特有嘅恬靜悠閒！

我所講嘅豆腐店就係呢間銀豆腐，喺當地非常有人氣，聽說唔少有名嘅丼飯店、炸豬扒店，使用嘅豆腐都係用銀豆腐嘅來貨！

銀豆腐唔單止係外觀簡樸，店門亦係關上。透過玻璃映入眼簾嘅竟然係一個小型豆腐工廠，推開門打咗聲招呼，店主從小門走出嚟，親切咁向我哋打招呼。

一間小店只係賣一樣嘢，咁嗰樣嘢一定好掂。銀豆腐淨係賣一樣嘢，就係呢碗しやくり豆腐，每份只要210円。豆腐嘅色澤比較深，唔好睇豆腐好像好實淨細密，其實口感相當軟滑，而且充滿豆香。門口隔離有張檯，放置咗配豆腐食嘅醬油。雖然好多地方都鍾意加豉油食，但我個人始終鍾意甜食，如果有帶黃糖就好喇!

銀豆腐嘅豆腐外表簡單樸實，但係會令人愛上嘅味道，食完過咗一段時間，嘴入面依然可以感受到淡淡豆香！

日本其實很多店家並不喜歡人家影相，我詢問店主，佢大方咁叫我隨意影，非常有人情味。另外，日本幾難搵垃圾桶大家都知，食完豆腐個碗可以放入店內垃圾箱。

銀豆腐（はこねぎんどうふ）
店址：神奈川県足柄下郡箱根町強羅1300−261 (「強羅車站」)
營業時間：AM 7：00 ～ PM 17：00 (星期四公休)
交通：箱根登山電車「強羅車站」

只係食碗豆腐又點夠飽呢？所以我哋去銀豆腐附近嘅田むら銀かつ亭食lunch，我們抵達後發現勁多人喺度等位，所以攞咗位後就決定去附近行下。我哋沿住啱啱條路，穿過鐵路行番去強羅站外，就會見到箱根強羅公園。

大家見到呢個指示牌，順住斜坡行到尾轉左就到箱根強羅公園，時間大約6分鐘。如果唔想從「強羅駅」行上強羅公園，可以選擇搭登山纜車到「公園下駅」/「公園上駅」，徒步1分鐘就會到。如果持有箱根Free Pass，可免費進入箱根強羅公園賞景賞花。

箱根強羅公園
1914年開園嘅強羅公園係日本最早嘅法國式庭院，園內有好多植物與一座歐式噴水池。而除了庭院，裡面仲有間日本村舍式茶室：白雲洞茶苑，現今已經登記成為日本國家有形文物，並且對外開放。

強羅公園內由多個溫室和花園所組成，好有法式花園feel，據說公園種植咗超過200多種植物，而當中最出名係玫瑰和薰衣草，今次嚟時未到薰衣草季節，所以緣慳一面。

行完熱帶植物園，沿著標示就嚟到白雲洞茶苑。日式古樸嘅建築幾吸引，因為遊客很少，所以就進去參觀。

大家除咗參觀外，只要俾500円就可以喺著名嘅白雲洞茶苑內享用茶點。

雖然有日式風格嘅白雲洞茶苑，但強羅公園實際上係一個法式庭院，好天氣時喺噴水池旁邊賞花，感覺好悠閒舒服。

另外，公園內仲有提供各式各樣嘅藝術體驗，例如吹玻璃、陶藝等等。嚟到箱根有時間嘅話，可以行下呢個開放咗超過一個世紀嘅公園。

行完強羅公園，返到田むら銀かつ亭 (田村銀勝亭)大約45分鐘，仲差2張枱就到我哋。

田むら銀かつ亭花園嘅小山坡上種滿咗芝櫻，啱啱遇上開花嘅時候，好靚好鮮豔。

田むら銀かつ亭店內座位都幾多，而且分成兩種: 榻榻米同普通櫈。登記時店員會問咗客人意願再安排，我呢種懶人梗係坐番普通櫈啦！

田むら銀かつ亭 (田村銀勝亭)喺箱根數一數二嘅名店，嚟到梗係要乖乖排隊，一嚐當地美食。店內嘅豆腐料理非常出名，另外箱根嘅豬肉幾出名，所以亦可以試試炸豬扒。

豆腐かつ煮定食
上菜時陶鍋裏面嘅醬汁仍然微微滾著，香氣隨著蒸氣飄散，陶鍋保溫效果都幾好，吃到最後食物都仲係暖嘅。豆腐かつ煮原來係豆腐釀入豬絞肉，豬肉好鮮甜，豆腐厚實但又口感嫩滑充滿豆香，醬汁嘅味道好似燒汁甜甜地，加上蛋液與麵衣，將各種最簡單嘅材料組合一起變成一道鄉土料理。

炸豬排御膳
喺日本品嚐名店嘅炸豬排一定冇錯，呢度都唔例外。炸豬扒表面酥脆完美，但肉嘅部分略嫌豬扒本身油花太重，雖然脂香味鮮，但我唔太慣咁重油份，食2塊已經覺得膩。所以我都係向大家推薦其他喺其他地方食唔到嘅招牌豆腐かつ煮。

店名：田むら銀かつ亭( 田村銀勝亭 )
官網：http://ginkatsutei.jp
營業時間：11:00-14:30 / 17:30-19:30
地址：〒250-0408 神奈川県足柄下郡箱根町強羅1300-739

食飽飽當然繼續我哋嘅行程。提提大家，雖然箱根嘅交通好完善，每個景點都會有交通工具直接抵達，但班次唔算好頻密，所以大家要好好咁plan下。如果有購買箱根Day Pass，會有份箱根交通時刻表，可以根據上面嘅資料計畫行程。

箱根有多個美術館進駐，由於時間關係唔會全部都去，箱根玻璃之森美術館同係同一集團，裏面大同小異。我對雕刻完全冇興趣，所以箱根雕刻森林美術館亦唔啱我。好彩喺箱根有全球第一間嘅小王子博物館，如果你鍾意小王子嘅話就一定要嚟潮聖喇！

強羅站外就有箱根登山巴士，大家可以根據想去嘅景點或者目的地選搭唔同路線。箱根登山巴士嘅設計非常有心思，車頂用咗天窗設計，方便遊客觀賞沿途風景。可惜當日係陰天，大部分植物都未長出新芽，完全冇嘢睇!幸好司機係個好可愛嘅靚仔，靚仔到可以做明星都得，加上100分嘅笑容同一手好車，真係令人心情開朗，心曠神怡!

乘搭登山巴士唔使半個鐘就嚟到星の王子さまミュージアム(小王子博物館)

落車之後首先映入眼簾嘅係一座法式建築物，白色鐵門上掛著小王子嘅旗幟。

星の王子さまミュージアム
呢座博物館係以深受世人愛戴嘅法國兒童文學名著——小王子 ( Le PetitPrince，日本人稱之為「星の王子さま」即「星座小王子」) 與作者安托萬·德·聖-埃克蘇佩里 (Antoine de Saint-Exupéry) 為主題嘅博物館。

博物館入口擺放咗小王子同佢嘅星球-B 612小行星。
喺小王子一書中提到，小行星B 612喺1909年被一位土耳其天文學者喺一夜嘅觀測中發現。喺小王子嘅行星上，有一間比行星稍細嘅小屋，三座火山、巴歐巴樹苗及一朵玫瑰花。而實際B 612小行星嘅大小，從光度推測直徑約2～5 km。

小王子呢本書，相信大家都有睇過，當然我都唔例外，但我對作者聖-埃克蘇佩里 (Saint-Exupéry)同故事創作背景從來都冇好深入去了解。

入到嚟第一件事梗係買飛啦！如果有買箱根周遊券，入場費會有優惠，原價每位￥1600，折後￥1400。

繪有小王子插畫嘅入場門票好可愛，對於鍾意小王子嘅朋友嚟講，肯定係好有收藏價值。

穿過Entrée(入口)，好似穿過咗隨意門，迎面而嚟嘅係純法式風情嘅。

一入到去，令人覺得置身法國某個小莊園，庭園由園景設計師吉谷桂子設計。如果遇上繡球花季節，整條小徑會開滿繡球花。

然後嚟到玫瑰花園，仿照普羅旺斯小鎮而建的小廣場中央豎立住小王子塑像。

園內大致上分成五個區域，1、室外花園區，2、里昂街道，3、聖埃克蘇佩里教堂，4、小王子展示區，5、咖啡廳、紀念品販售區

唔知係因為天氣比較凍又或者係非旺季，遊客人數並不多，令整座博物館中多咗份愜意與閒適。

其實博物館是為咗紀念作者 Saint Exupery 誕生 100 周年而建，足足籌備咗12年，先建成今天所見嘅博物館。為了向作者致敬，館內重現了與作者有深厚緣份的嘅20世紀初法國里昂街頭。

相中最右邊嘅就係仿照位於里昂聖-埃克蘇佩里出生嘅房子，同真嗰間有9成相似。

喺蟒蛇小徑，四周都係栩栩如生嘅小王子故事裡面嘅人物彩色塑像。

小王子從B 612小行星出發到各星球旅行，拜訪形形色色嘅人，遇見孤獨傲慢嘅國王、每一分鐘都工作嘅點燈人、從不出門嘅地理學家……仲有五千朵同他心愛嘅玫瑰一模一樣的花，但冇人同佢建立真正友誼。最後小王子嚟到地球，降落喺沙漠，偶遇咗狐狸。狐狸教他關於友情、愛情嘅真理。

著名嘅「蛇吞象」係作者小時候嘅第2號作品，俾大人批評後，作者放棄咗做畫家嘅夢想。花圃嘅形狀亦係「蛇吞象」。

小徑盡頭係一間小教堂。秋天時應該遍佈紅葉，相信又係另一境界嘅美麗。小教堂仿照作者小時候經常去禱告嘅教會，裏面嘅彩繪玻璃隱藏咗小王子故事中嘅人物。

日本人真係好認真，園內一草一木都好精緻，其實里昂街道嘅每間小店都唔可以進入，但依然好仔細裝飾櫥窗，擺放著各式佈置，配合館內主題。

跟住就到博物館核心-小王子展示廳，除咗介紹作者嘅生平故事外，仲展覽出當時嘅照片和書信，仲有好幾個房間嘅擺示陳列，就連作者小時候生活過嘅房間一一重現。除此之外，館內亦將故事書裏面嘅世界呈現出來。

《小王子》（法語：Le Petit Prince、英語：The Little Prince）是法國貴族作家、詩人、飛行員先驅安托萬·德·聖-埃克蘇佩里創作中最著名嘅小說，發表於1943年。作為法語書籍中擁有最多讀者同譯本嘅小說，《小王子》曾當選為20世紀法國最佳圖書。亦係世界最暢銷圖書之一，被翻譯成250多種語言和方言，全世界迄今已售出兩億多冊，年銷售一百多萬冊。

喺博物館呢度見到好多唔同嘅翻譯本。各位小王子粉絲一定要參觀1樓展覽室，除咗可以一次過與各個角色「見面」，仲展示咗超過一百個語文版本嘅小王子童話書。

作為法國幾個最高文學獎的得主與二戰起始時嘅預備役飛行員，聖埃克蘇佩里在法國淪陷，自己流亡美國時完成了手稿。其大半的著名作品都是其時在感情劇變和健康惡化的狀況下寫出的，這之中就包括那個關於一個跑到地球來嘅小王子有關孤獨、友情與得到而又失去嘅愛嘅感人小故事。

《小王子》故事中嘅水彩插圖全是聖埃克蘇佩里自己一個人畫嘅，佢青年時期學過建築，但完全不能據此認定佢係個畫家——正如佢喺《小王子》開頭自嘲般咁講。

聖埃克蘇佩里終其一生都在不停地塗鴉。佢不時會喺類似給情人嘅信，筆記本，手絹，桌布或隨便其他地方上畫小人。他經常會畫小人追蝴蝶嘅畫，有人問他呢d畫有咩意思，把這些j將塗鴉小人當成自己第二意志嘅聖埃克蘇佩里會說，畫中小人追嘅實際上係「實體化嘅理想」。最終，小王子成為現在我們所熟知嘅樣子：早熟嘅小孩子，一頭蜷曲嘅金髮。

小王子這個形象可能受作者聖埃克蘇佩里弟弟幼年外貌嘅啟發。佢小時一頭蜷曲嘅金髮，被朋友和家人叫做「太陽王」（Le Roi-Soleil）。

而小王子安慰飛行員話自己嘅身體只係一具空殼亦係來自作者嘅弟弟。佢喺臨死時，對守在病床前對作者講：「別擔心，我很好。撐不下去的只是我的身體。」

故事中狐狸講嘅嗰句「玫瑰之所以唯一而特別只因他愛她」，源於作者喺紐約密友漢密爾頓。而《小王子》標誌性語句「人只有用自己的心才能看清事物」據說同樣係漢密爾頓說嘅。（法語：On ne voit bien qu’avec le cœur. L’essentiel est invisible pour les yeux.）（英語：One sees clearly only with the heart. What is essential is invisible to the eye.）

除此之外，狐狸講嘅其他幾句話在書中也相當有意義，例如「你要永遠對你所馴養的對象負責」、「是你對你的玫瑰所付出的時間，才使你的玫瑰變得重要」和「馴養我吧。我不過是成千上萬隻狐狸裡的其中一隻，跟別的沒什麼不同。你要是馴養了我，在這個世界上我就是獨一無二的狐狸。如果你要馴服一個人，就要冒着掉眼淚的危險。」

喺展示廳的入口放咗一架紅色小飛機，因為作者聖-埃克蘇佩里與飛行充滿關連性。

聖-埃克蘇佩里係飛行員，1900年6月29日生於法國里昂，曾經為祖國披甲對抗納粹德軍。他以1943年出版嘅童話《小王子》（Le Petit Prince／The Little Prince）而聞名於世，位於其家鄉里昂嘅聖-埃克蘇佩里機場以佢命名。

喺佢嘅經典兒童小說《小王子》出版一年後，即係1944年7月31日執行一次飛行任務，當時佢駕駛一架偵查型P-38閃電式飛機，由科西嘉島起飛前往法國南部偵查時失蹤，時年44歲。1944年獲得「法蘭西烈士」稱號。喺佢逝世50周年時，法國人將佢與小王子嘅形象印在50法郎嘅鈔票上。直到2004年4月，離奇失蹤近60年嘅飛機殘骸喺法國南部馬賽附近海域被法國文化部考察隊尋獲。