5-9月京都夏季限定！出發去貴船避暑，增加戀愛運＋食流水素麵 （2）
京都係一個歷史悠久嘅古都，境內有無數嘅神社與寺廟，各有各嘅特色。貴船神社係祭祀著守護京都水源水神嘅神社，參道上排列嘅紅色獻燈係貴船神社俾人最深刻嘅印象。
古老嘅貴船神社，神社起源不明，創建年代不詳。據社內史料記載，日本初代神武天皇（西元前711-535）之母玉依姬命搭乘黃船，溯淀川、鴨川、貴船川而上，著陸之地就係宜家嘅奧宮。境內嘅御船形石據說由玉依姬命嘅黃船化成。根據記載，鞍馬寺與貴船神社喺796年同時建造。直至1055年，因為水患問題改遷到現址成為本宮，原處改稱奧宮。
處於鴨川之源、水源之森的貴船神社係專門祭祀水神闇淤加美神（クラオカミノカミ），自古以嚟就係祈雨所其中之一。而《少年陰陽師》中主角呼喚高龗神「タカオカミノカミ」。其實，神名內嘅「龗（オカミ）」與「淤加美」都係龍嘅古字。日本人相信神龍擁有呼風喚雨嘅能力，相信龍乃司掌水同雨嘅神明，而「闇」同「高」都係指山谷之意，所以兩種稱呼係相通嘅，不過貴船神社使用嘅係「高龗神」。
日本全國一共有大約450間貴船神社，位於貴船山嘅貴船神社就係總本社。貴船神社由本宮、結社同埋奧宮所組成，分散喺貴船山上。正宮同奧宮嘅御祭神係高龗神，而結社嘅御祭神係磐長姬命。
結社就係ひろ文（流水素麵店）行上少少就到，而奧宮就由結社再行多大概5分鐘。
如果大家要求姻緣就要去結社，結社供奉日本古代結緣之神磐長姬命。因為受到夫家退婚而搬到貴船川旁，立誓要令世人得到良緣。只要戀人用綠色細長草葉結喺樹上，就會得到良緣，所以稱為結社。宜家大家可以係本宮買「結び文」同繪馬嚟嚟到祈求締結良緣、提升人緣、行桃花運。
和泉式部（平安時代嘅女作家、和歌歌人、歌仙）亦都有參拜過貴船神社，祈禱與關係變差嘅丈夫重修舊好並且實現嘅傳說，令作為結緣嘅神社擁有極大嘅人氣，所以貴船神社係京都3大戀愛神社之一。（雖然兩人後來雖然分開咗，但和泉式部一生中裙下之臣無數。）
「物思へば沢の螢も我が身よりあくがれ出ずる玉かとぞ見る」。這首就係和泉式部到貴船神社參拜，見到貴船川漫天螢火蟲時所作嘅和歌。
意思就係：朝思暮想，螢光似吾身。魂牽夢縈，點點均吾玉。（玉，靈魂之意。）
與結社完全相反，奧宮流傳住一則令人毛骨悚然嘅孽緣故事。故事源自日本傳統能樂謠曲《鐵環》：一女子因為幽會咗3年嘅男人移情別戀，女子執著所愛但又恨男人始亂終棄，於是每夜丑時頭戴插著三支燃燒蠟燭嘅三腳鐵環（三支蠟燭代表感情、仇恨、怨念），然後上山去到神社，用三吋鐵釘喺樹幹上釘稻草人偶，進行「丑の刻參り」，詛咒拋棄佢嘅男人同第三者。傳說詛咒最後被陰陽師安倍晴明作法破除，女子最後自殺死亡。大家如果有睇過《陰陽師》應該唔會陌生。
本宮正殿旁不斷湧出御神水係聖山貴船山嘅水，參拜前記得先淨手漱口。
喺貴船神社本宮可以見到黑白馬塑像。古代信眾會向水神進獻馬匹，作為祈願謝禮。如果想祈求天降甘露就進獻黑馬，祈求豔陽高照就進獻白馬。當時就連貴族出入大多都係乘搭牛車，所以就連神社對照顧呢D馬匹都好困難。
於是逐漸改為由紙或土製大小馬塑像取而代之。到咗平安時代，改為由喺木板上繪製馬匹圖案嘅「繪馬」代替。宜家喺日本神社隨處可見嘅繪馬，發源地就係喺貴船神社。記得一定要將「繪馬」掛係指定位置，千歧唔好搞錯。
如果係一般「祈願繪馬」就掛係本宮。所有「繪馬」都可以喺本宮嘅龍船閣自行購買。
如果想求姻緣，就要喺本宮購買印有和泉式部同螢火蟲嗰款繪馬（500円）同埋綠色「結び文」（200円）。
寫上願望後，將綠色「結び文」綁喺繪馬上面，繫上結社嘅架上。
貴船神社夏季嘅祭典，除咗每年6月1日係貴船祭（例祭），仲有7月7日同日舉行嘅貴船の水まつり（貴船水祭）同七夕神事，所以會好多人嚟參拜。
貴船祭（例祭）就有抬神轎儀式。逢係同水有關嘅行業都會嚟參與貴船水祭，例如料理店、製酒業、和菓子等等。
「七夕笹飾」(Tanabata kazari)：七夕神事限定，由7月開始，為期一個月。神社會提供5色笹飾短冊（100円），等大家可以增強人緣、締結良緣，特別受年輕情侶歡迎。
日本嘅七夕祭源遠流長，早喺奈良時期（710年—794年）從中國傳入，「牛郎織女」與日本嘅傳統文化相互融合，並且加入咗《古事記》「棚機傳說」。棚機津女(Tanabatatsume)係傳說中嘅織布少女，為替全村消災，喺水邊織衣祭神，更與神結成一夜夫妻， 因此七夕嘅日文讀音為Tanabata(たなばた)。
深受古代中國「青黃紅白黑五色」之說影響，日本人相信五色代表東南西北中五個方位，有咗向天供奉祭祀星星嘅習俗，大約室町時代(1338年-1573年)，貴族開始以短冊(籤)書寫和歌(詩歌)許願，到了江戸時代(1603年-1867年)更全面普及，直到宜家仍然係日本夏天嘅風物詩。
「七夕笹飾」： http://kifunejinja.jp/tanabata.html
貴船神社從平安時代起就擁有眾多參拜者，佢哋深信貴船神社嘅結緣力量，唔單只係戀愛運，仲有能夠得到一輩子幸福嘅傳說。
信眾可以喺本宮門口左側嘅授與所選購御守等授與品。如果見到有鍾意嘅物品，就俾錢巫女，等佢幫你包好。
貴船神社最出名就係水占卜。呢個占卜喺日本電視劇中出現過好多次，深受年輕女性喜愛。大家喺授與所自行購買水占みくじ （水占御神籤）。除了步驟文字，仲有可愛彩繪令人一睇就明，非常貼心！
1. 先將200円放喺水占御神籤隔離嘅木盒。（如要找續，可以請巫女幫忙。）
2. 然後憑感覺抽一張水占御神籤。
3. 到水占齋庭進行水占卜。
水占齋庭位於貴船神社正殿對出嘅正前方。
選好水占みくじ（水占御神籤）後，拿着空白的水占籤走向水占齋庭。心中想好願望或者問題，再將水占御神籤輕放喺御神水上面。
貴船山自然湧出嘅御神水，水質優良甘冽，受到日本好多茶道家嘅好評，而且具有治癒百病嘅療效。曾經有日媒搵咗專家化驗，確認御神水靈波磁場旺盛，所以先會有獨特嘅水占卜。
當水占御神籤遇水後，漸漸就會現出文字，籤詩便會浮現眼前，所以被稱為水占卜。
當籤詩顯示出嚟，大家就可以拎番水占御神籤上水，睇下自己嘅運程。
好嘢！抽到吉籤！心情即刻變好。唔好講笑，籤詩真係好準！！！
水占御神籤乾咗，籤詩又會再次消失。如果大家抽到唔好嘅籤，記得一定要將水占御神籤綁喺隔離個架上面，留喺神社等神明幫你消災解厄，咁先算完成整個水占卜嘅程序！（如果抽到好籤可以帶走，亦可以綁喺神社內，隨大家鍾意。）
參拜完不斷湧出御神水嘅貴船神社，心情亦變得好清淨，更可以令人重新感受水嘅神聖之處。
我哋從神社正門離開。見到貴船神社超級出名嘅標誌－一整排紅色獻燈，每座獻燈上都會刻著捐獻嘅機構。
每年一到紅葉季節，貴船神社都會舉行特別嘅亮燈活動—「貴船紅葉燈籠」。 燈光裝點下嘅紅葉和神社十分美麗，亮燈活動會持續到11月底。
而近年貴船神社喺冬天積雪嘅日子舉行特別嘅夜間亮燈活動。因為京都下雪嘅日子並唔多，要有積雪就更加難。舊年(2015年)整個冬季只係舉行過4次夜間亮燈，完全可亦話係可遇不可求。如果大家旅行時遇上京都下雪，就要留意啦！
貴船神社 雪見ライトアップ詳情
日期: 1月1日-2月29日
時間: 日落至晚上8時
地點: 貴船神社本宮
會唔會舉行亮燈活動，要喺當日下午3時(日本時間)在下列網站中公佈，出發前一定要先去貴船神社官網check下，因為太大雪或惡劣天氣係會取消活動。
貴船神社官網 http://kifunejinja.jp/
Facebook https://www.facebook.com/kifunejinja
Twitter https://twitter.com/kifunejinja
離開貴船神社，我哋番去貴船山入口處嘅巴士站等巴士番貴船口站。
車站旁邊有一個小小避雨亭等大家可以坐喺度等車。
好似我呢種坐唔定嘅人，見架車仲未夠鐘嚟，梗係喺附近行下啦！
喺度可以見到一大片杉林，又好似墮入宮崎駿嘅動畫世界之中。
四周非常寧靜，只係聽到貴船川嘅淙淙流水聲，而且空氣非常清新，感覺被氧氣包圍住一樣。呢個牌喺寫住「水源之森 鞍馬山 貴船山」，係全日本水源之森百選之一。
大家有假期去旅行，不妨抽一日去到鄉間森林深呼吸，釋放平時緊張嘅壓力。夏季嚟到貴船避暑，既可以食流水素麵消暑，又可吸收源源不絕嘅芬多精（Pythoncidere）同負離子，令身心全面得到舒緩，咁先係旅行真正嘅意義。
貴船神社
地址：左京区鞍馬貴船町180
參觀時間：6:00～20:00，無休
交通：叡山電車貴船口站下車，轉搭巴士上山，巴士落車處往上行大約5分鐘左右／京都巴士貴船下車徒步5分鐘
參觀費：免費
電話：075-741-2016
官網：http://kifunejinja.jp/
留言列表
