今次嚟箱根玩，一定要住晚溫泉旅館先算係完滿。箱根係箱根湯本、塔之澤、大平台、宮之下、小涌谷等地溫泉嘅總稱，箱根有箱根二十湯，換言之喺箱根呢度係有好多溫泉旅館俾大家選擇。我呢個有選擇困難症嘅嚴重患者千挑萬揀，終於先界箱根 星野リゾート同山の茶屋兩間溫泉旅館作出決定，最後入住山の茶屋 (YAMA-NO-CHAYA)。
位於塔之澤嘅「山の茶屋」比較偏僻，雖然都近登山電車塔之澤站，但呢個站比較少人清冷，加上山路難行，建議大家搭湯本溫泉鄉共同バス(送迎巴士)比較方便。大家最好早d入住，因為共同巴士6點45分就會開出最後一班。大家記得有嘢就喺呢度買啦，旅館附近係咩都冇，包括冇便利店㗎!
箱根旅館嘅湯本溫泉鄉共同巴士站就喺箱根町總合觀光案內所外面（箱根湯本駅對面）。湯本溫泉鄉共同巴士分為A、B、C路線，每個鐘嘅15分與45分各有一班，車費係100円（唔可以用箱根周遊券，絕對係有料巴士嚟㗎）。
大家去「山の茶屋」就要搭C路線往塔ノ沢方向，上車時投入100円硬幣，司機會問大家要去邊間旅館，所以要記一下旅館日文名又或者寫定落張紙俾司機睇。
開咗車大概5分鐘就到，司機會提大家落車！落車位對面就係山之茶屋嘅吊橋，好可惜唔係我鍾意嗰種搖搖晃晃嘅吊橋。
吊橋堅固程度係可以承受2噸以下嘅車開過（1次限1架車，時速10公里），所以大家行喺吊橋上係非常非常安全嘅!
當初無意中見到山の茶屋，就俾旅館名字吸引咗，上官網睇過覺得乎合哂我設嘅條件，於是放棄界 箱根，喺山の茶屋官網訂房。搵箱根溫泉旅館時，我設嘅條件有以下幾個：
1、和式房間，瞓Tatami (榻榻米)
2、房內要有私人風呂
3、有貸切風呂（可以私人預約嘅溫泉）
4、要有最少兩個大浴埸
5、餐點要係日式料理，可以喺房內用餐，
6、旅館房間唔好多，減少旅行團入住機率
7、旅館唔可以太舊，環境好
開出咁多條件，因為住溫泉旅館我只會做4樣嘢:食、瞓、浸溫泉加hea，所以唔想俾其他人騷擾。既然價錢唔在我考慮範圍之內，咁梗係揀間令我滿意㗎啦!
深山、吊橋、川流、竹林、櫻花，淨係旅館周圍嘅環境已經好靚好正，令人好relax! 四周非常寧靜，只有吊橋下嘅早川溪谷流水聲激出源源不絕嘅大自然交響曲！原來喺東京近郊嘅箱根已經有秘湯一樣嘅溫泉旅館。
行上一個小斜坡，穿過竹林步道、石階，很快就來到山之茶屋嘅接待處。呢個完全係我心中嘅日式溫泉旅館面貌。
其實我哋未上到嚟，旅館職員已經出嚟幫我哋拎嘢，迎接我哋。我掛住影相，搞到大家一直㩒住門等我入去，日本人真係有禮貌到令人唔好意思。
確認好姓名後，就有專屬女將（OKAMI）帶我哋上房。佢一路行就一路向我哋道歉，因為旅館女將(老闆娘)個仔仔發燒，所以早走咗，唔可以親自接待我哋。
山の茶屋全館只有15間客室，所以非常寧靜舒適。
行上2樓，走到走廊盡頭就係我哋預訂嘅房間 —「山の夕」。
房間隔離就已經係室內大浴場(かじかの湯)，超級方便。
「山の夕」（やまのゆうべ）露天風呂付客室
一入到房發現竟然仲靚過網頁上嘅相，感覺更加舒服，勁開心！
我哋嘅行李已經好乖咁喺房入面等我哋。
女將沖好茶，等我哋可以一邊飲茶食溫泉饅頭，一邊向我哋講解入住細節。
首先向我哋介紹旅館設施，說明露天溫泉嘅男女交替使用時間。每間旅館都有唔同安排，而山の茶屋會替換3次，所以使用前一定要睇清楚，唔係到時入錯咗好大鑊。
然後女將會同客人確認晚餐時間，如果想使用貸切風呂，記得呢個時候預約。另外仲有租借浴衣等等需要都同女將講，請佢幫手安排。
等女將離開後，我立即開始探索房間。啱啱一入房，就聞到一陣淡淡香氣，原來房內嘅插花係鮮花。
充滿大和風情嘅小廳有個小吧檯同小雪櫃，仲有腳底按摩器等大家鬆一鬆。
個人好鍾意呢個小小嘅休息空間，竹排令整間房增添咗一份雅致。只要將整面落地窗戶打開就可以連接外面，呼吸箱根嘅新鮮空氣。
竹を敷き詰めた月見台
雙腳踏上竹排地板嘅感覺真係好正，月見台係架空伸出花園，房內有開液體蚊香同紗窗外，所以大家想親近大自然，都不怕有昆蟲飛入嚟。
而露天風呂與洗手間就在小廳隔離。 廁所另外喺獨立房間內係日本慣有嘅設計。
房間內嘅露天風呂比我想像中更正，因為呢個溫泉係24小時不停流動，所以感覺更乾淨，隨時都可以跳落去浸番夠本。塔之澤溫泉係箱根湯本溫泉後方嘅溫泉。泉質係單純泉・塩性單純泉，對神經痛・關節痛・冷性體質有療效。
南部砂利を佐官で仕上げた露天風呂がある
浸溫泉就係要浸呢種凹入地下嘅風呂先夠feel㗎嘛是! 唔好睇個風呂細細，但浸落去就知個風呂都幾深，除非身高有180或以上先需要屈起雙腳。
話到明係露天風呂，梗係冇窗遮擋。大家可以一邊浸溫泉，一邊望出外面嘅花園。好似我哋咁喺春天嚟，入夜後山中氣溫得幾度，就可以體驗到嗰種外面凍，而你就浸住暖笠笠嘅溫泉嗰份幸福感。
住得溫泉旅館梗係要預約一泊二食嘅plan啦! 嗰日全館爆滿，原本想1930食晚餐，但廚房同工作人員都忙到爆，於是女將問我哋可唔可以夜少少先食。我哋當然冇所謂，反正平時都唔會咁早食飯，加上大家都食緊飯，咁去大浴埸泡湯先唔會撞到其他人，仲唔即刻衝去泡湯。
八點鐘準時開飯! 山の茶屋嘅餐點每個月都會轉一次，而部份材料會根據當日嘅新鮮程度轉換。除咗好靚嘅餐具外，首先有女將為我哋奉上一小杯水果酒，為呢餐懷石料理晚餐打響頭炮。
第一道就係先八寸，先八寸類似前菜，以季節為主題嘅菜色，通常由1種壽司與幾道較小份嘅小菜組合而成。懐石料理極端講求精緻，無論餐具還是食物嘅擺盤都要求很高（食物份量少）而被一些人視為藝術品。
先八寸有7道小菜: 若草豆腐、春菜粉肝、蛸櫻煮(章魚)、炸春芋團子、味噌青瓜、蛋捲同埋三文魚壽司球。
7種不同嘅小菜組成，每種都有各自嘅滋味，令人食到春天嘅感覺。由於味道比較清淡，所以印象並唔深刻。
除咗豆腐料理，箱根另一種好出名嘅料理就係蒸籠料理。訂房時見到旅館有得供應，所以訂咗2人份試下。
女將會將蒸籠搬到房間，然後慢慢蒸熟。喺等候嘅時間，我哋梗係繼續食其他嘢啦！
椀盛 ，係以當季嘅菜、肉、魚類組成嘅汁物料理。而今天為我們準備嘅係由魚蝦同薯粉製作而成嘅魚丸。魚丸嘅口感非常好，配上用鰹魚、昆布所熬製嘅湯汁，味道好鮮美。
造里就係刺身組合。即使身處喺山中，但魚生一樣非常新鮮，白身魚清甜爽口，拖羅入口即化，完全可以媲美高級壽司料亭。
煮物用一個金碗裝住上檯，打開碗蓋，裏面係酒蒸大山地雞配搭櫻花蝦味噌。
跟住落嚟蒸籠料理， 蒸籠放入旅館自家泉源嘅溫泉水將肉類同蔬菜蒸熟。
我預訂嘅係3種肉類加野菜套餐，包括: 神奈川足柄牛、箱根山麓豬、大山地雞與當地新鮮蔬菜。
用蒸煮嘅方式烹調食物，可以令大家食到食材嘅原味。當然旅館亦有提供幾款唔同嘅醬料俾大家配搭。足柄牛肉質好軟滑; 箱根山麓豬選用五花腩，所以油花好多，肉味好甜但是膩，; ; 山野菜係我最鍾意嘅，因為好新鮮美味。我哋最食唔慣嘅係雞肉，女將同我哋講，因為箱根嘅大山地雞係通山走，所以肉質好結實，無咩脂肪。我哋食落雞肉真係好「鞋」,雖然好有雞味，但佢哋習慣食原味，所以口感好寡。
食完令我有d失望嘅蒸籠料理後，接住就係組肴。組肴有兩款: 鰆蕗味噌燒同海鮮山蔬拼盤。鰆蕗味噌燒即係烤魚，魚肉烤到好香，但味噌落得太多，令整體味道變得好鹹。
組肴另一道菜係海鮮山蔬拼盤，材料有炙燒黑毛和牛、大蝦、蠔、大根等等，味道食落似關東煮，呢道係我其中覺得滿意嘅菜式。
當然料理仲未完結，馬上就上咗酢物。酢物係加咗醋嘅醃製食物，因為我唔食加咗醋嗰d帶酸味嘅食物，亦唔食醃製食品，所以完全冇掂過。
跟住就到食事，即係主食。釜飯可以選擇白飯或者筍飯，唔食筍嘅我揀咗白飯，幫好友揀咗筍飯，點知廚房搞錯咗，俾咗兩個白飯。白飯放咗備長炭一齊煮，食嘅時候可以配燒明太子同鹽昆布塊送飯。
除咗釜飯外，仲有香物 (季節性醃製蔬菜) 同留椀 (味噌湯) 。
最後嚟到甜品時間，水菓子係香蕉朱古力mousse配上士多啤梨。
老實講，山の茶屋嘅晚餐餐點令我幾失望，好多都唔啱我口味外，有幾款餐點都係得個樣，食完都唔知食咗咩咁嘅感覺。
一食完晚餐，女將收拾好枱面，另一個工作人員負責舖床。女將會詢問我們明天嘅行程，睇下大家需唔需要幫手，關於寄送行李番箱根湯本站、點樣搭車去唔同景點、同埋車次時間表都可以請女將安排。
工作人員將我哋食飯張檯桌面換上榻榻米面板，然後㩒一㩒牆上嘅開關掣就變成榻榻米。
唔講真係唔知嗰度係張餐桌。
兩張被鋪迅速鋪設完成！超正！係我最愛嗰種鬆軟嘅被鋪，住溫泉旅館就係要瞓咁樣嘅tatami被鋪。
住溫泉旅館，客人可以話係兩手fing fing 咁入住都得。
旅館會提供客人所需嘅用品，無論係你諗到定諗唔到。
唔單止沐浴用品有2種俾大家選擇，就連基本嘅護膚用品有有兩套，不過呢個係有男女之分，睇包裝應該都唔會用錯嘅!
食完飯箱根嘅天空開始飄落雨絲，冷風中聽住雨聲浸住溫泉真係太正太爽。浸完溫泉敷番個mask，再同好友飲多杯，先舒舒服服瞓個靚覺!おやすみ！（晚安）
留言列表
