Jovus的美好頹廢時光

香港係一個充滿歷史色彩嘅地方，喺呢個地方每座建築、每棵樹都可能擁有不為人知嘅傳奇故事。好多人都以為一定要出到新界或者郊區尋找，但其實好多都隱藏喺市區嘅一角，默默守護住我哋。作為一個港島人，放假當然係喺港島區四處遊玩啦！咁熱嘅天氣當然唔會長時間喺戶外玩，今次我哋去嘅地方就係金鐘喇！金鐘大家都一定去過好多次，但大家又知唔知關於金鐘嘅故事呢？

「維多利亞港」呢個大名，即使唔係香港人都一定知，不過唔知大家有冇聽過「維多利亞城」呢？其實「維多利亞城」係1841年英國人佔領香港島後所建立嘅城區，位於港島西北岸，即係宜家中西區同灣仔區一帶，中心就係香港聖公會聖約翰座堂。

維多利亞城以界石去標示邊界，宜家大家會根據地鐵站去分區，漸漸造成地理認知嘅混亂。事實上，金鐘原本係中環一部份，「四環九約」有西環、上環、中環、下環；灣仔同銅鑼灣屬於下環，金鐘就屬於中環。所以現在按區議會劃界，金鐘屬中西區，而銅鑼灣屬灣仔區。

香港開埠初期，英國殖民地政府將金鐘呢個地區劃作軍事用地，即係宜家花園道以東、正義道以西、堅尼地道以南一帶，只係留咗皇后大道東作為民用空間。以皇后大道東為分界，北面沿海地帶屬於英國皇家海軍，南面山坡則為英國陸軍所有。喺陸軍地段中部嘅小山崗上，建有三軍司令官邸，東面為域多利兵房（Victoria Barracks），北面為威靈頓兵房（Wellington Barracks），西面為美利兵房（Murray Barracks）。海旁當時係英國皇家海軍基地，海軍按照傳統稱基地所在為「Admiralty」，意思即係少將級或以上海軍司令坐鎮嘅基地。

地鐵通車後以金鐘為站名是有典故：昔日位於皇后大道東（現金鐘道）路旁嘅駐港英軍兵房樂禮樓（Rodney Block），其大門口懸有一個金色銅鐘，每逢中午及下午便敲打，作為士兵、文職人員及工人的午饍及放工訊號，故此附近居民稱此營房為「金鐘營房」，此地區亦順應稱作「金鐘」。

域多利軍營（Victoria Barracks），又稱域多利兵房，係香港昔日駐港英軍一個主要軍營，位於港島金鐘，喺紅棉路、堅尼地道及金鐘道交界一帶，現址為香港公園一部分，軍營內部份建築物得以保留，舊三軍司令官邸（茶具文物館）被列為法定古蹟，另外幾座建築物被列為香港一級歷史建築。

改建期間域多利軍營大部分建築物被拆，現僅存數座歷史建築：

舊三軍司令官邸又稱旗杆屋（Flagstaff House），建於1846年，屬希臘古典復興式風格，曾經是香港殖民地時期駐香港英軍三軍總司令的官邸，為香港現存最古老的英國殖民地色彩建築物。現在這座建築物已改為香港茶具文物館。

舊域多利軍營卡素樓 （Cassels Block）－1992年改作香港視覺藝術中心、
華褔樓（Wavell Block）－1991年起改為香港公園觀鳥園教育中心、
羅年信樓（Rawlinson House）－地下現設紅棉路婚姻登記處，一樓闢作香港公園辦事處、
蒙高瑪莉樓（Montgomery Block）－1987年起改為母親的抉擇及啟勵扶青會辦公室、
羅拔時樓（Roberts Block）－1986年起轉作新生精神康復會賽馬會新生宿舍。

域多利軍營軍火庫（Explosives Magazine of the Victoria Barracks）－
位於港島金鐘正義道、香港公園範圍外，面積約7,800平方米，作存放軍火之用。軍火庫附屬於域多利軍營，四座前軍事建築物喺1843年至1930年代落成，作為研製與儲存炸藥之用。喺20世紀初，英國皇家海軍佔據及擴大使用範圍。駐港英軍於1979年遷出軍營後，舊軍火庫成為政府工作間及倉庫。軍火庫擁有極高軍事歷史價值，係亞洲現存唯一英國殖民時代完整軍火庫遺址，亦係昔日英軍將炸藥製成炮彈嘅地方，軍火庫上層平台嘅三個爆炸品貯存庫，被列為一級歷史建築；下層平台嘅GG樓列為二級歷史建築。

亞洲協會香港中心 (英語：Asia Society Hong Kong Centre)，為亞洲協會香港分會活化保護嘅建築群，用作舉辦唔同嘅展覽及學術活動，推動亞洲藝術文化同引進新進藝術家、文化界人士作品。中心喺2012年2月9日起正式對外開放。 中心內設古蹟域多利軍營軍火庫，現稱（The Hong Kong Jockey Club Former Explosives Magazine） 。現時軍火庫為亞洲協會香港分會總部，該會將軍火庫舊址活化，翻新為劇院及博物館。

當日嚟啱啱趕到 Shahzia Sikander Apparatus Of Power《莎茲亞‧西坎達：意象演義》呢個展覽最後一日展期。

首先搭lift上平台，一出lift就見到下一個展覽《影．亞洲》，展覽首次於本港展出舉世知名攝影大師布萊恩．布瑞克以及深受大師作品影響嘅史蒂夫．麥凱瑞作品，當中包括呢一幀令麥凱瑞蜚聲國際嘅作品「阿富汗少女」。

張洹：長島佛 Long Island Buddha，2011（銅和鋼）

長島佛呢件作品係藝術家張洹遊歷西藏時，從民革時遺留落嚟、被人為破壞嘅佛像中取得創作靈感。其實印度、泰國等東南亞國家嘅大佛好多都係臥佛，長島佛面部雖然刻意做到有凹痕，但臉部表情卻相當安詳。長島佛加上周圍嘅環境，反而俾到我一種平和寧靜嘅感覺，令我覺得即使身處亂世，只要能夠保持初心，就可以唔受外界影響。

喺軍火庫上層平台可以望到政總，有種原來出世與入世只係一線之差嘅感覺。

提提大家，如果容易俾蚊針嘅朋友記得要噴蚊怕水，因為呢度好多蚊，好友嘅美腿完全係蚊嘅大餐。好彩我係蚊嘅絕緣體咋！

軍火庫主要為域多利軍營貯存與混合火藥，並在此進行處理、包裝、儲存及分發火藥到全港各處嘅防禦基地。建築群分為上層平台及下層平台，其中位於上層平台嘅軍火庫及舊實驗室在1868年落成。

軍火工場舊址屬於一級歷史建築，原本係英軍用作混合軍火炸藥嘅工場，經過復休同活化後，成為行政辦公室及兩個會議室。

軍火工場旁邊有四塊海軍界石，係用作軍事地段標記嘅花崗岩石碑。中心喺進行初期挖掘工程時，發現咗7塊海軍界石，喺20世紀初，英國皇家海軍就係使用呢D海軍界石劃分界線。呢4塊界石原本放置喺周邊唔同位置，標明域多利軍營嘅邊界及所有權。

軍火工場旁邊就係人工護堤A。軍火庫設有兩座人工護堤，分隔軍火工場、軍火庫A及軍火庫B，以防止軍火庫爆炸波及其他設施。而喺復修期間掘出4支第二次世界大戰時期遺留落嚟嘅大炮，宜家分別展示喺護堤A嘅兩端。

香港開埠之初唔單單係漁村。當時香港亦擁有天然資源－大量花崗岩石，本港採石與打石工藝喺開埠時相當著名，大家可以由石牆嘅手工可見一班。另外，香港建築物嘅花崗岩顏色原來可以反映開採年份，越早期岩石顏色愈紅，到舊立法會大樓興建時 (1900s) 已經「白淨」好多。50年代興建舊政府總部時，由於摩利臣山開採嘅花崗岩石會起鏽漬，所以最後採用鑽石山開採嘅花崗岩石。

經過護堤A，就嚟到軍火庫A舊址。軍火庫A建於1863-1868年間，係一個備有控制爆炸設計嘅火藥儲存倉庫，大家入到裏面參觀就會見到。宜家經過修葺活化，成為麥禮賢夫人藝術館。由於藝術館內唔可以影相，當然要遵守規矩啦！

藝術館展出《莎茲亞‧西坎達：意象演義》，呢個展覽係莎茲亞‧西坎達喺本港首個主要個展，中心內會展出多件紙本畫作和大型動畫。展題意指西坎達的意象蘊含能於不同語境、形態和方式表意的潛能。個人覺得展覽作品充滿民族、宗教色彩，加上作品中運用咗好多特別嘅物料。

繼續往前走便來到護堤B旁嘅流水池，經過呢度就去到軍火庫B。

軍火工場同2個軍火庫外都有銅製火藥軌，建於十九世紀晚期。火藥軌連接著裝配及檢查彈藥嘅軍火工場，以及貯藏彈藥及火藥桶嘅軍火庫A及B。彈藥會被運上長四呎嘅卡車內，卡車由域多利軍營嘅吊重機拉動，沿軌道往返。除此之外，火藥軌仲連接住架空纜線方便運送火藥到灣仔軍器廠街。宜家呢條火藥運輸軌依然好好保留喺原有位置。

繼續往前行會看到軍火庫B，由4個拱頂室及一條拱頂照明廊組成。建於1905年至1907年間，為紅磚建築，斜頂起角，曾用作儲存火藥用途。

建於1900年代嘅軍火庫B（Former Explosive Magazine B）建築風格與軍火庫A大相逕庭。軍火庫B係紅磚建築物，同旁邊以堅硬花崗岩建成嘅軍火庫A相比，保護性似乎低好多。

軍火庫B經過多次復修，宜家活化成麥禮賢劇場，可以容納100名觀眾。

環繞住軍火庫B喺一條照明廊（拱型天花長廊），由石磚砌成，係為咗提供一條安全嘅照明通道以便檢查軍火。照明廊裡面，保留住以前嘅燈槽，由於火藥庫唔可以點明火照明，以防爆炸，所以喺設計上面照明廊和火藥倉之間隔著一塊玻璃，火水燈就放係照明廊呢邊，熱空氣自燈罩向上經通道散走。宜家照明廊依然放上一盞盞別緻嘅油燈點綴，令參觀者可以感受以前喺軍火庫工作嘅氛圍。

活化後照明廊成為嘉賓、演出人員出入前後台、更衣室嘅專用通道。

庭院古樹，一睇就知生命力幾頑強啦！

呢個就係軍火庫A嘅背面，其實同以前相差唔遠。

新舊對照

連接住接待處同上層古蹟區係一條雙層行人天橋。當時工地附近森林內發現有果蝠棲息，所以架空天橋設計由直線改為臂彎形環抱式設計，上層稱為康本橋，下層則命名為果蝠橋。為咗保存果蝠棲息地，以確保工程唔會破壞附近歷史文物和生態環境。

沿住果蝠橋行番到接待處入口，牆洞後有瀑布水池「來寶水之源 (Noble Water Feature)」。

跟住我哋嚟到GG行政樓。位於下層平台、獲評為二級古蹟嘅GG行政樓建於1940年代末，曾被英國皇家憲兵隊特別調查組使用。軍營GG座亦用作軍事物資嘅補給前哨站和火藥庫。英軍於20世紀初完成擴建後，喺1910年將軍火庫移交給英國皇家海軍，至1979年英軍遷出域多利軍營後，軍火庫成為各個政府部門嘅工作間及倉庫，而GG座則曾用作英國皇家陸軍財務隊軍餉辦事處、維修承辦商工作間，以及土力工程處土芯樣本貯存室，1980年代起荒廢。

GG行政樓內部

喺GG行政樓隔離就有酒吧餐廳AMMO，AMMO即係「彈藥」嘅意思，非常貼合所在地點。餐廳由本地名廚Tony Cheng同創立The Drawing Room嘅顧問主廚Roland Schuller策劃。好友喺度訂咗位食Afternoon tea~

喺中心入口處見到「長頸鹿樹」，係香港好常見嘅細葉榕，高16米，樹冠闊15米，樹齡超過70年歷史。因為樹形貌似長頸鹿，擁有長頸鹿龐大身軀與修長頸部得名。「長頸鹿樹」嘅獨特形態已經成為中心嘅標誌。呢棵兼具自然與歷史價值嘅「長頸鹿樹」，正正位於正義道入口處，GG樓旁邊，大家記得去探下呢棵樹啊！

唔好講笑！一聽到「長頸鹿樹」就令我想起Running Man同光洙，hahaha～

「長頸鹿樹」背後仲有段小故事：
2008年，本港罕有錄得4次8號或以上烈風吹襲，「長頸鹿樹」就喺當年颱風季節被雷擊中，部分主樹幹被燒毀，損害嚴重，差D要被移除。後來經過搶救同護理，「長頸鹿樹」先可以保存落嚟。宜家中心繼續採取特別保護措施，加上長期監察「長頸鹿樹」嘅生長環境，保護呢棵外形稀奇可貴嘅大樹。

AMMO內部裝潢靈感源自1965年法國黑白科幻電影名作－Alphaville，再參考此地過去嘅軍事用途，將古銅配搭金銅，充滿工業味道之餘，又低調咁散發出高貴奢華氣息。餐廳樓高5米，3面玻璃屋設計，空間感十足。

由於有訂位，所以安排我哋坐喺餐廳左邊嘅沙發區。座位好舒服，非常適合一邊食tea，一邊傾計。窗外就係一大片綠色植物，亦可以見到果蝠橋。而餐廳內連接住紀念品店同GG行政樓。

我哋order咗個tea set，由於是日未吸收到足夠咖啡因，所以我選擇咗咖啡。而好友就想飲茶，餐廳提供6款有機茶包俾大家選擇，有Ginger Lemongrass, Earl Grey, Breakfast Tea, Oasis, Black Current, Mint~

過了一段時間，三層架afternoon tea set送到我們面前！鹹點有5款，甜點有3款，另外有2件scone！食下午茶當然由鹹點開始啦！

Savory （第1層：鹹點）

Wagyu beef burger with cheese on bamboo charcoal bun （芝士和牛竹炭漢堡）

Chicken consommé jelly with chicken ragout （清雞湯啫喱配蔬菜燉雞肉）

我第一個就係食和牛漢堡，和牛好juice，配埋半融芝士，無敵！個人覺得係成個tea set中最正嘅item！我唔係太鍾意清雞湯啫喱，好友覺得ok，我哋都覺得鹹咗D。

Savory （第2層：鹹點）

Parma ham with figs （無花果配巴馬火腿）

White anchovies with ratatouille on toast （白鯷普羅旺斯雜燴多士）

Shrimp spring roll with basil mayonnaise （蝦春卷配羅勒蛋黃醬）

到咗第2層鹹點，首先試咗無花果配巴馬火腿，咁嘅配搭一定冇錯嘅，不過略嫌火腿太乾身，無花果又冇汁，配蜜瓜可能會好D。當然如果火腿靚，咁就梗係咩都唔使加啦！其實我覺得白鯷普羅旺斯雜燴多士係好味嘅，但錯在加咗白鯷。雖然咁樣令味道更有層次，但鯷魚好腥，而且魚肉經過醃製，好似魚乾咁，食完嘴入面只留下腥味。好彩呢個時候蝦春卷上面嘅basil蛋黃醬救咗我，因為醬料加入新鮮basil，所以味道好fresh，加埋蝦春卷，正！係成個tea set中第二鍾意嘅item！

Dessert （第3層：甜點）

Almond financier （法式杏仁小蛋糕）

Green tea cheese cake （抹茶芝士蛋糕）

Milk chocolate mousse with apricot compote （牛奶朱古力慕斯配蜜餞杏桃醬）

法式杏仁小蛋糕係甜，不過杏仁味好香，加上上面嘅黑朱古力醬一齊食，味道超夾！抹茶cheese cake嘅抹茶味同cheese味都好突出，好明顯用咗靚抹茶粉，所以食到抹茶嘅甘、香味，但食完一啖就覺得超甜，好彩留番raspberry最後食咋！

牛奶朱古力慕斯配蜜餞杏桃醬－底層係杏桃jelly，中間係牛奶朱古力慕斯，上層係蜜餞杏桃醬。呢款甜品應該係用心之作，可惜我由細到大都超憎杏桃味嘅嘢，試咗一啖就放棄。

Raisin scone with blueberry jam and cottage cream

Scone有兩件，一個有提子乾，一個冇提子乾。咁就啱啦！因為我唔食提子乾，咁就唔使爭啦！Afternoon tea最重要就係個scone好食， AMMO嘅scone俾到我驚喜，味道質感都相當唔錯，配埋藍莓醬同cottage cream更好味，有encore多個嘅衝動！

由於cottage cream俾得好少，所以我哋每人食咗半個scone就冇咗，所以就請餐廳俾多D我哋。點知隔咗都有10mins先再送過嚟，而且cream嘅質地完全唔同晒！原本係軟化挺身，變成半融一pat咁，雖然味道一樣，但食落質感完全錯咗。

我覺得AMMO嘅afternoon tea最好就係分量啱啱好，唔會太多，咁先合乎afternoon tea嘅原則，good！

食完tea，我哋行番去金鐘地鐵站。途中經過太古廣場上面、港島香格里拉酒店旁邊嘅「榕圃」，每次去香格里拉食tea，都會睇下呢棵古老大榕樹。榕樹樹幹有一米半粗，樹冠直徑足有二十多米，獨樹成林，非常壯觀，形成一座以它為中心嘅小公園。

呢棵老榕樹估計喺1870年種植，屬於當時英軍域多利軍營一部分。1979年，英軍遷離軍營。1985年太古地產用7億投得地皮發展太古廣場，而其中一個條件就係必須負責保育、保護老榕樹。當時地產商曾向政府建議將榕樹搬到其他地方，以免妨礙工程進行，但當時嘅政府強烈反對。（如果係宜家，老榕樹應該會俾呢個無良政府砍咗喇！）

為咗原位保留老榕樹，工程人員特別喺地下建造咗一個直徑18米、深10米嘅巨型圓筒花盆，先固定好老樹，再喺大花盆底下起樓。單係呢項工程就用咗2389萬港元，堪稱「最昂貴嘅保護措施」。除咗可以話係全港耗資最多保存嘅一棵樹，亦可能係全球耗資最多保存嘅一棵樹。

老榕樹見證住香港百年滄桑，未來亦會繼續守護我城。只有懂得尊重當地歷史、文化，愛惜當地嘅一草一木，先可以講自己係愛嗰個地方。當人們真正愛嗰個地方，先可以領悟出作為當地人嘅價值。

跟住就過番銅鑼灣睇《寒戰2》！平時我好少睇港產片，唔係唔支持本地製作，相反成日都好想支持，但每次到失望。今次睇《寒戰2》亦唔例外，只可以講，希望越大，失望越大。

睇完戲去咗經常幫襯嘅Burgeroom飲酒食嘢。經常講日本嘅食店幾十年、甚至百年歷史嘅老店都可以保持食物水準同質素。其實香港都有咁樣嘅食店，Burgeroom係其中一間，開業咁耐味道都係咁好，應該繼續支持。

食完正餐，跟住又點少得甜品呢？！未嚟過銅鑼灣呢間新開嘅Lady M，所以嚟試試！

好彩Lady M仲有蛋糕食，原本想食Earl Grey Mille Crêpes同銅鑼灣店獨賣嘅Chocolate Mille Crêpes，點知Earl Grey Mille Crêpes已經賣晒，所以唯有order Signature Mille Crêpes同Chocolate Mille Crêpes！

第一次食Chocolate Mille Crêpes，覺得好味道，但我同好友都覺得Signature Mille Crêpes冇之前咁好味喇！

1. 亞洲協會香港中心及商店

開放時間：星期二至日：上午11時至下午6時、展覽期間每月最後一個星期四：上午11時至下午8時 （逢星期一休館）
最後入館：閉館前60分鐘
麥禮賢夫人藝術館 (前稱亞洲協會藝術館) – 只於展覽期間開放*
下期展覽：《影．亞洲》（2016年9月10日至2017年1月7日）
http://asiasociety.org/hong-kong

2. AMMO

3. Burgeroom

Shop D, G/F, 50-56 Paterson Street, Fashion Walk, Causeway Bay, Hong Kong
Tel: (852) 2890 9130
Opening hours: Mon – Sun: 11:00am-00:00 midnight
http://www.burgeroom.com/

4. LADY M (CAUSEWAY BAY BOUTIQUE)