江之島必食！美味生白飯魚丼－8日8夜東京上山下海花見之旅 Day 4 @ Jovus的美好頹廢時光

江之島•湘南海岸•鎌倉一日遊（4）－東京近郊日歸小提案

江之島落山捷徑＋超多口味雪糕屋＋しらす問屋とびっちょ美味白飯魚丼

當我哋離開江之島岩屋，就沿住嚟嘅路回程離開！如果大家已經遊覽完畢，可以喺度直接搭船離開。但因為我哋會喺島上食lunch，所以就行番返去參道！

我哋一直行返去中村屋羊羹店，隔離有一間きたさん茶屋。

きたさん茶屋有超多唔同口味嘅雪糕，目測超過50種味，一個雪糕350yen。除咗比較大路嘅各種生果口味，仲有毛豆、清酒、竹炭等等比較日本嘅口味。但最正係，呢度仲有江之島特產－白飯魚口味同水母口味嘅雪糕！因為想像到個味應該會好怪，所以我係冇試嘅～

我叫咗粟米濃湯味，因為細個好鍾意食一款粟米味雪條，但後來冇再出，好傷心！後來嚟日本旅行，喺其他地方都試過粟米味雪條或者粟米濃湯味雪條，都覺得好味，冇中過伏！個人覺得呢度個粟米濃湯雪糕都係類似嗰種味，係我鍾意嘅，好味道！

好友叫咗咩味，我完全唔記得喇！因為係我唔食嘅味，所以冇試下，但好友都覺得佢個雪糕好味。

我仲買咗貓之島特別飲品，一場嚟到貓島點可以唔買番D喵星人product！（其實喺嚟嘅時候已經買咗喵星人products，但完全唔記得咗！）

買完雪糕，如果大家有跟足我嘅路線遊覽，應該已經將江之島上嘅景點都行過一次㗎喇！回程嘅路就等於去程嘅路，啱啱嚟嗰時要落幾多級樓梯，等於返去要上幾多級樓梯，係咪未行都覺得攰呢？！傻豬嚟嘅～等我話你知一條落山捷徑喇！跟住嚟喇！唔係行錯咗就「蘇州過後冇艇搭」㗎喇！嗱！就係中村屋羊羹店左手邊有條小路，即係下圖嗰個白色衫男士行入去嗰條路，就係落山捷徑！！！

成條落山捷徑都係向下行嘅，坡度唔算斜，比起又要上樓梯又落樓梯好好多！

沿途嘅風景都唔錯㗎！只有一條直路落山，唔使驚行錯路！

行到落山，就會發現呢度係江島神社紅色鳥居右手邊嘅小路！曾經喺江之島嘅觀光海報上見過呢個位，當時已經好鍾意，好有宮崎駿筆下嘅畫面！呢條紅色橋叫「御X橋」（我唔記得咗佢個名～）都可以通往江島神社。

就係呢張2016年•春嘅江之島觀光海報～

其實呢條路就係穿過「瑞心門」去到「福石」，「福石」左邊有條小路通往呢條橋。大家遊覽完整個江之島，拜完弁天女神，睇下可唔可以喺「福石」旁邊執到嘢喇！（搞錯啊！使唔使咁乾淨啊？！連片葉都冇得俾人哋執～）

好喇！行咗咁耐真係超餓！喺江之島有三間食店都好正，好想食，包括丸だい仙水、しらす問屋同江之島亭。但我哋只可以揀其中一間。由於丸だい仙水有齊江之島必食三寶：白飯魚（吻仔魚）、螺貝類、伊勢龍蝦，再加上好友超like「仙水」呢個名，所以我哋出發前就決定要嚟仙水食！

丸だい仙水超易搵，因為一到江之島參道口就見到招牌，店嘅位置就喺左手邊！點知，我哋見到丸だい仙水嘅位置，完全冇留意到人哋嗰日休息！！！當我哋想食嘢時先好sad發現呢件事～

於是我哋就決定嚟しらす問屋とびっちょ（Tobiccho）食嘢喇！しらす問屋とびっちょ超受歡迎，所以勁多人排隊。唉！我最唔鍾意就係等！咁點解唔去江之島亭？因為江之島亭喺山上，我已經餓到冇力行上山喇！

攞咗等位號碼，大概要等30mins，呢個時候梗係睇下食D咩喇！提提大家，呢度係會用日文叫號碼，所以唔識少少日文就比較麻煩。不過等位時間其實都預計得幾準，唔使太擔心。

喺店內見到有大魚缸有我想食螺貝類，咁我梗係唔會錯過啦！

餐廳位於2樓，大家要喺樓下等位，有位先上樓上。

由於しらす問屋とびっちょ（Tobiccho）嘅丼飯好大個，而我哋又決定今晚會早食晚飯，所以只係叫咗一個丼飯set（1550yen）再加燒蠑螺（750yen）！雖然我哋只係叫咗一個set覺得唔多禮貌，有d唔好意思，但所有店員仍然好友善。

我哋揀咗五色丼飯set，丼飯有三文魚籽、櫻花蝦、吞拿魚蓉同江之島特產生熟白飯魚，個set仲包一碗麵豉湯同飲品。順帶一提，每年1-3月中呢段期間係白飯魚禁捕期，所以呢兩個半月唔會有生白飯魚，想試就要避開呢段時間嚟江之島喇！

丼飯嘅每一樣材料都俾得好多、好豐富，食落覺得好新鮮，完全冇腥味，每一樣材料充滿鮮甜味。其他我唔多講，但講下食生白飯魚嘅感覺，食起嚟軟軟滑滑，咬下去有D脆脆嘅口感，幾得意，唔算好重白飯魚味，反而熟白飯魚重魚味好多。個人超愛櫻花蝦，正！丼飯仲有大量蔬菜，好健康！醬油燒蠑螺好好味，燒得啱啱好，肉質爽口彈牙，加上醬油超好味，所以一定要食！